Жараспайдың тастүлегі
Талантты жастарды қолдау – ел тағдырын ойлаған елдің ісі. Жалпы, қазақ халқы өнерлі өрендерге кенде емес. Өнердің сан түрі бар, бірақ, ақындық ол Алланың берген сыйы. Арқа төсінен де ақындардың ізін басып, поэзия дейтін әлемге қанат қағып келе жатқан жас ақындар жетерлік. Сондай дара дарындардың бірі – шалғай жатқан ауылдан шығып, шартарапқа жырдан шашу шашып, шаршы топта сөз бастап жүрген Аярыс Қапыш.
Әке тәлімі ұл үшін орны бөлек десек, Қапыш аға да өнерден құр алақан емес, бірнеше аспапты меңгерген, өз ортасында әу деп әуелететіні де бар. Кішкентай кезінен бала көңілден шыққан балаң жырларын қойын дәптеріне түртіп жүретін Аярыстың айтысқа аттаған алғашқы қадамын сол кездегі ұстазы Дінжан Ғайниденұлы байқап, алға жетелеп, аламанға қосқан болатын.
Жыр алыбы Жамбыл атаға арналған айтыста басталған алғашқы адым, республикалық кезеңге дейін жол бастаған болатын. Биыл да сол сара жолды жалғап, жас дарындарды қолдау, ұлттық өнерді ұлықтау мақсатындағы байқауда Аярыс Дарабоз дара шауып, І орын иеленіп, облыстық ақындар айтысына жолдамаға ие болды. Қарағанды қаласында мектеп оқушылары арасында республикалық «Ақберен» байқауының облыстық кезеңіне қатысты. Алты номинациядан тұратын додада жүзден астам өрен бақ сынасты. Аярыс айтыста I орын иеленіп, байқаудың республикалық кезеңіне жолдама алды.
XIV «Ақберен» шығармашыл оқушылар арасындағы өнер байқауының республикалық кезеңі Астана төрінде өтті. Еліміздің түпкір-түпкірінен келген жүзден жүйрік, мыңнан тұлпар жүз жиырмадан астам өнерлі жас өрендер алты түрлі номинация бойынша өз өнерлерін паш етті. Солардың ішінде Аярыс арнайы сертификатпен марапатталды. Бұл жоба тек ғана өнерге баулып қоймай, балаға рухани орта қалыптастырып, байтақ елдің бұрыш-бұрышынан дос табуға ықпал етті.
Тек айтыс емес, түрлі байқауларда бақ сынап, талай жерде қанжығасы майланып жүрген Аярыс Жараспай ауылының ғана емес, бүтін нұрлы Нұраның мақтанышы.
Балнұр АЙТЖАНОВА,
Жараспай жалпы
білім беретін мектебінің қазақ тілі мен әдебиеті пәні мұғалімі.
Нұра ауданы
