Жарқын өмірдің жаршысы
Нью-Йорк қаласында әлемге әйгілі қарағандылық суретші Кәріпбек Күйіковтың суреттерінің «Полигон жаңғырығы» атты көрмесі өтті.
БҰҰ штаб-пәтерінде Ядролық қаруға тыйым салу туралы шартқа қатысушы мемлекеттердің конференциясына Қарағанды облысының делегациясы да қатысты.
Өңірден барған делегация өкілдері Семей ядролық полигонының құрбаны, әлемге әйгілі суретші Кәріпбек Күйіковтың суреттері мен облыстық тарихи-өлкетану музейінің қорынан «Полигон жаңғырығы» атты фотокөрмемен таныстырды.
«Біздің отанымыздың өнерін БҰҰ сияқты маңызды халықаралық тұғырнамада таныстыру – біз үшін үлкен мәртебе. Біз шығармашылық пен өнер арқылы бейбітшілік пен тұрақтылықтың маңыздылығы туралы, жаһандық қауіпсіздікті қолдаудағы әрбір адамның рөлін жеткізе алатынымыз анық», – дейді облыстық мәдениет, архивтер және құжаттама басқармасының басшысы Еркебұлан Жұмакенов.
Ядролық қаруды таратпау жөніндегі конференция – үкіметтерді, ғалымдарды, белсенділер мен азаматтық қоғам өкілдерін қоса алғанда, әлемнің түпкір-түпкірінен делегаттарды жинайтын әлемдік аренадағы маңызды оқиға.
Облыс ұйымдастырған көрме қатысушылардың назарын бейбітшілікті сақтау жөніндегі жаһандық күш-жігердің маңыздылығына аударды.
Аймақ делегациясының осы маңызды форумға қатысуы Қазақстанның әлемдік қоғамдастықпен мәдени және дипломатиялық байланыстарын тереңдетуге ықпал еткенін мақтан тұтады. Кәрікбек Күйіков көрмесі, сондай-ақ, мұражай қорындағы фотокөрме конференция бойы жұмыс істеді.
Көрмеге күн сайын 100-ден астам адам келіп, олардың әрқайсысы Кәріпбек Күйіковтің өнеріне, Қазақстанның ядролық қаруды таратпау қозғалысына қосқан ерекше үлесіне тәнті болды.
– Семей полигоны – КСРО-ның ядролық сынақ полигондарының бірі, аса маңызды стратегиялық нысанасы болды. КСРО ядролық сынақ жүргізуге Қазақстанды таңдады. Өйткені далалық жері көп, халық саны аз. Қазақстанда 1949 жылы алғаш рет сынақ басталды. Семей полигоны жабылғанға дейін қазақ даласында қаншама жарылыс жасалды. Ата-анам сол сынақтарды өз көзімен көрген. Картиналарымда сол ядролық жарылыс сәтін, сынақтың зардабы тиген қазақ шаңырағын бейнеледім, – дейді суретші.
Кәріпбек өзінің өнерінің арқасында әлемдегі бейбітшілік пен ядролық қарумен күрестің символына айналған жан. Қылқаламның құдіретімен өз картиналарында адамзаттың қасіретін жеткізді. Сонысын әлем мойындады. Кәріпбек Күйіков Нобель сыйлығының номинанты болды. Әлемнің бірнеше елінде Кәріпбек Телтайұлының картиналары көрмеге қойылды. Сондай-ақ, ол «Невада-Семей» халықаралық антиядролық қозғалысының белсендісі болып, Семей ядролық полигонының жабылуына зор үлес қосты. Оның әр туындысында күрес, үміт, бейбіт, өмірге ұмтылу бар.
«Оның шығармаларын таныстыра отырып, біз еліміздің бүкіл әлемдегі бейбітшілік пен тұрақтылықты қолдайтынын көрсеттік. Біздің басты мақсатымыз – болашақ ұрпақ үшін қауіпсіз, гүлденген әлемді қалдыру!», дейді делегация құрамындағылар.
Қасымхан БҮРКІТҰЛЫ,
«Ortalyq Qazaqstan»
