Жаңалық мәдениетке үндейді
Қарағандыда қатты тұрмыстық қалдықтарды жинау үшін арнайы пункттер ашылып, жаппай еуро-контейнерлер орнатылып жатыр. Енді мұндай орындар тәулік бойы операторлар назарында болмақ. Мамандар «Бұл тұрғындар арасында қоқысты сұрыптау мәдениетін қалыптастыру үшін қажет» дейді.
Қарағандыда тұрмыстық қалдықтарға арналған 800 алаң бар. Өкінішке қарай, сондағы контейнерлердің дені әбден ескірген. Көбі қирап, бүлінген.
Енді бұл орындарда жаңа қоқыс жинау пункттері пайда болды. Сонымен қатар, пластик, шыны, немесе, қағазды сұрыптау контейнерлері орнатылып жатыр.
– Қоқыс жинау барысы оператордың жауапкершілігінде. Тазалық – солардың мойнында. Қатты қалдықтарды сұрыптау үшін бар жағдайды жасауға тырысамыз. Яғни, пластик, картон, қағаз, шыныға арналған бөлек орындар қарастырылған. Тұрғындар бұны ескерсе екен, – деді қоқыс шығару бойынша коммуналдық қызметтің санитарлық тазалау шебері Марина Потешина.
Әзірге қаланың бірнеше шағын ауданында 17 пункт жұмыс істеп тұр. Тұрғындар «Мұндай орындар шаһар тазалығы үшін ауадай қажает» дейді.
– Бұрын қоқыс маңайға шашылып жататын. Жел тұрса болды, берекеміз қашады. Бұл жаңалыққа қуанып қалдық. Қоқыс шашылған жерде вирус, инфекция да жүреді. Балаларымыздың денсаулығына алаңдайтын едік, – деді қала тұрғыны Майраш Әбдірахманова.
Еуро-контейнерлерге жиналған қоқысты тасымалдау үшін заманауи техника сатып алыныпты. Тұрмыстық қалдықтарға арналған станция ашылды.
Ерік НАРЫН,
Ortalyq.kz