Жаңаарқада жұт болып, жылқылар қырылуда
1 наурыз күні ҚР АШМ Мал шаруашылығы департаменті директорының міндетін атқарушы Б. Аймұрзаев пен ҚР АШМ Ветеринарлық бақылау және қадағалау комитетіне қарасты Биологиялық қауіпсіздік басқармасының басшысы М. Мұхтаров жылқылардың жаппай қырылу себебін тексеру үшін Ұлытау облысына барды, – деп хабарлайды ortalyq.kz АШМ баспасөз қызметіне сілтеме жасап.
Бұған дейін, Жаңаарқа кенті мен Қаражал қаласы арасындағы көлік жолының бойынан 23 бас жылқының өлексесі табылған болатын.
Жаңаарқа ауданына барған делегацияның мәліметінше, ауа-райының қолайсыздығынан, 2023 жылдың желтоқсаны мен 2024 жылдың ақпан айында қардың қалың түсуінен және температураның төмендеуінен және жайылымдарға мұз қатуына байланысты жылқылардың тебіндеуі қиынға соққан. Оны тайлар мен кәрі жылқылар көтере алмаған. Ауыл шаруашылығы жануарларын сәйкестендіру базасының дерегі бойынша қазіргі уақытта ауданда 84,3 мың бас жылқы тіркелген.
– Жаңаарқа кенті мен Қаражал қаласы арасындағы автомобиль жолының бойынан өлексесі табылған 23 бас жылқының сәйкестендіру нөмірі болмай шықты. Өлекселер мал қорымына жеткізілді. Сонымен қатар Жаңаарқа ауданында сәйкестендіру нөмірі жоқ тағы 44 бас жылқы табылды. Осылайша, жайылымда өлген 67 бас жылқының иесін де анықтау мүмкін болмады. Аудандық ветеринарлық станцияларға жылқылардың өліміне қатысты иесінен әлі ресми түрде өтініш түспеген. Айта кетейік, Ұлытау облысында 2000 бас және Жаңаарқа ауданында қолда бар мал басының жартысы өлді деген ақпарат шындыққа жанаспайды, – дейді ҚР АШМ мамандары.
Қазіргі кезде ауылдық ветеринарлық дәрігерлердің, жергілікті атқарушы орган өкілдерінің, мемлекеттік ветеринарлық-санитарлық инспекторлардың қатысуымен өлген жылқыларды жинау және олардың өлекселерін жоюмен айналысып жатыр. Бұл жағдай АШМ Ветеринарлық бақылау және қадағалау комитетінің Ұлытау облысындағы аудандық аумақтық инспекцияларының қадағалауында болады.
Материалды әзірлеген АИДА РАХЫМҚҰЛОВА
