Жаңа орталық жастар үшін
Балқаш қаласында «JasSpace» жастар зияткерлік-спорттық орталығы ашылды. Жобаның құрылысына 216 миллион теңге қаржы бөлінген. Жаңадан ашылған ғимаратқа «Коунрад» Қоры құрылтайшылары («Сары Қазына» ЖШС және «Медная компания Коунрад» ЖШС) демеушілік жасаған. Орталықтың ашылу салтанатына арнайы қатысқан Балқаш қаласының әкімі Сапар Сатаев енді бұл ғимаратта балқаштық жастар елімізде жүзеге асып жатқан мемлекеттік бағдарламалар жайлы мағлұмат алып, түрлі кеңес өткізетіндігін және спортпен шұғылдана алатындығын жеткізді.
– Өздеріңіз көріп тұрғандай, «Коунрад» Қоры 14 пен 35 жас аралығындағы қала тұрғындарын қызықтыратын «JasSpace» жастар зияткерлік-спорттық орталығын құру бойынша ауқымды жобаны аяқтап отыр. Жоба аясында үй-жайларды толық қайта құру, оның ішінде күрделі жөндеу және тамаша әрлеу, сонымен қатар қасбетті жаңарту жұмыстары жүргізілді. Орталықты толық жабдықтау үшін барлық қажетті құрылыс материалдары, заманауи жиһаздар, құрал-жабдықтар мен спорттық жабдықтар сатып алынды. Бұл орталық Президент тапсырмасына сәйкес, өңірімізде жастар саясаты туралы заңды іске асыру, жастардың рухани-мәдени әлеуетін көтеру және олардың бос уақытын тиімді ұйымдастыру мақсатында ашылып отыр, – деді Сапар Сатаев.
Сонымен қатар, Central Asia Metals бас атқарушы директоры Гэвин Феррар, «Коунрад» Қоры президенті Ник Ширли, «Сары Қазына» ЖШС Бас директоры Раулан Қозғамбаев құттықтау сөзін жеткізді. Сондай-ақ, нысанның құрылысын жүргізген бас мердігер «Коунрад» Қоры президенті Ник Ширли «JasSpace» жастар зияткерлік-спорттық орталығының директоры Мағди Дүйсетайға ғимараттың символикалық кілтін тапсырды.
Бұдан кейін, орталық жұмысымен танысқан қала әкімі киім ауыстыратын бөлмелерді, душ кабинкаларын, спорт зал, компьютерлік сынып, STEAM білім беру алаңы талапқа сай орналастырылғандығын атап өтті. Сонымен қоса, шахмат, ұлттық зияткерлік ойындар алаңын, көрмелер алаңын, бейне және дыбыс жазу студиясын, баспасөз орталығын, OpenSpace жұмыс және байланыс аймағын аралап көріп, жастардың біліктілігін шыңдауға мықты маманадарды ұйымдастыру керектігін тапсырды.
Нұрдос КӘРІМ,
«Ortalyq Qazaqstan»
БАЛҚАШ
Суретті түсірген автор
