Жаңа Конституцияның жобасына теңгені ұлттық валюта ретінде бекітетін норма енгізілді – Бақыт Нұрмұханов
Конституциялық Сот төрағасының орынбасары Бақыт Нұрмұханов жаңа Конституция жобасын жетілдіру барысы және жалпыхалықтық талқылау нәтижесінде енгізілген негізгі өзгерістер туралы мәлімдеді. Оның айтуынша, құжат жарияланғаннан бері әртүрлі арналар арқылы 4 мыңнан астам ұсыныс түскен. Барлық ұсыныстар мен пікірлер Конституциялық комиссия тарапынан жан-жақты зерделеніп жатыр.
Талдау нәтижесінде бірқатар ұсыныстар баптардың мазмұнын толықтырып, құқықтық кепілдіктерді күшейтуге, нормалардың тұжырымын нақтылауға және құқықтық айқындықты арттыруға мүмкіндік берген.
Атап айтқанда, Конституцияның 2-бабы ұлттық валютаны конституциялық деңгейде бекіту нормасымен толықтырылды. Жобаға сәйкес, Қазақстан Республикасының ұлттық валютасы – теңге, ал теңгені эмиссиялау құқығы мемлекетке тиесілі болады. Сонымен қатар мемлекеттің егемендігі, тәуелсіздігі, унитарлығы, аумақтық тұтастығы және басқару нысаны өзгермейтіні туралы норма сақталған.
Сондай-ақ мемлекеттік органдарда саяси партия ұйымдарын құруға тыйым салу нормасын бап құрылымында нақтылау ұсынылған. Азаматтыққа қатысты 12-бапқа қос азаматтыққа жол берілмейтіні және өзге азаматтық болған жағдайда Қазақстан азаматтығын тоқтатуға негіз болатыны туралы норма енгізу жоспарлануда.
Енгізілген ұсыныстардың бірі – мемлекеттік органдардың немесе олардың қызметкерлерінің заңсыз әрекеттері салдарынан келген залалды өтеу құқығын Конституциялық деңгейде бекіту. Сонымен қатар 18-бап жаңа редакцияда нақтыланып, сот шешімінсіз адамды заңда көрсетілген мерзімнен артық ұстауға болмайтыны белгіленеді.
Бақыт Нұрмұхановтың айтуынша, жаңа Конституция жобасын жетілдіру жұмыстары жалғасып жатыр.
Материалды әзірлеген Аяулым СОВЕТ
