Жаңа көліктер – жұрт игілігіне
Кеше облыс әкімі Нұрмұхамбет ӘБДІБЕКОВ Қарағанды қаласы коммуналдық кәсіпорнының бас директорына арнайы техникалық кешеннің кілтін тапсырды.
Ілкімді іс-шара ел Тәуелсіздігінің 25 жылдығына орайластырылды. Мамандандырылған техникалар қатарында жүк тиегіш, арықтарды және жол бойын тазалағыш көліктер, МТЗ әмбебап тракторлары, түрлі құрамды және вакуумды шаң тазалағыштар бар. Олардың жалпы саны – 60.
Бұл техникалар «Өңірлерді дамытудың 2020 жылға» дейінгі бағдарламасы арқылы сатып алынған. Сондай-ақ, қарағандылық көлік базасының жаңартылуына Елбасының «Қазақстан-2050» Стратегиясы: қалыптасқан мемлекеттің жаңа саяси бағыты», «Нұрлы Жол – болашаққа бастар жол» Жолдауларын жүзеге асырудың шапағаты тиген.
Мұндағы мақсат – айқын. Облыс орталығындағы автокөлік жолдарын күтіп-сақтау, әлеуметтік нысандарға барар бағыттарды таза ұстау, халыққа қолайлы жағдай жасау.
– Біздің облыс орталығы – үлкен шаһар. Санитарлық тазалық 5 миллион шаршы метрден астам жерге жүйелі жүргізіліп тұруы тиіс, – деді аймақ басшысы.
Жаңадан іске қосылған техникалар коммуналдық қызметтің жұмыс сапасын арттырады. Сондай-ақ, коммуналдық қызмет жұмыскерлері бірінші рет бірыңғай киім үлгісін киюге көшті.
Қуаныш АМАНҚҰЛОВ
ҚАРАҒАНДЫ қаласы.
