Жаңа дүкен жұртшылық үшін
Ақтоғай ауданы әкімі Руслан Кенжебековтің бастамасымен өңірде әлеуметтік дүкендердің саны артып келеді. Негізгі міндет – әлеуметтік маңызы бар азық-түлік тауарларының бағасын тұрақтандыру және төмен бағадағы азық-түлікті қолжетімді ету. Жақында осы мақсатта аудан орталығынан «Мөлдір Әлем» азық-түлік дүкені салтанатты түрде ашылды.
Жаңа дүкеннің ашылуына аудан басшысы Руслан Кенжебеков арнайы қатысып, құттықтау сөзін жеткізді.
– Азық-түлік бағасын тұрақтандыру – халық қамы. Осы ретте мұндай дүкендердің септігі мол. Тұрғындардың қалтасын қақпай, тұрмысын түзеуге мүмкіндік береді. Бұл азық-түлік дүкенінің ерекшелігі – халық күнделікті бірінші кезекте тұтынатын азық-түлік өнімдерін төмен әрі белгіленген бағада сатып алады. Дүкеннің төріндегі сөреде тұрған азық-түліктер, расымен, әлдеқайда арзан. Халық игілігіне жарасын. Алдағы уақытта осындай дүкендер көптеп ашылса, қарапайым халықтың тұрмыс жағдайы жақсаратыны сөзсіз, – дейді Руслан Айтыкенұлы.
Айта кетейік, «Мөлдір Әлем» атты азық-түлік дүкенінің иесі жеке кәсіпкер Баян Искакова бағаны тұрақтандыру аясында «Айналым схемасы» тетігін іске асыру үшін «Сарыарқа ӘКК» АҚ арқылы қаражат алып отыр. Бұл бағытта жұмыстар жалғасын табатын болады.
Нұрдос КӘРІМ,
Ақтоғай ауданы
Ortalyq.kz
