Облыс әкімі Ермағанбет Бөлекпаев Балқаш қаласына жұмыс сапарымен келіп, өңірдің әлеуметтік-экономикалық даму барысымен танысты. Аймақ басшысы мемлекеттік бағдарламалар аясында жүзеге асып жатқан жобаларды аралап көріп, тұрғындармен ашық форматта кездесу өткізді.
Инфрақұрылым жаңғыртылуда
Сапар аясында облыс әкімі, ең алдымен, қаланың басты жылу көзі саналатын Балқаш жылу электр орталығына барды. Мұнда №6, 7, 8 қазандық агрегаттары мен №2, 6, 7 турбоагрегаттарының ағымдағы жөндеу жұмыстары аяқталған. Қазір №9 қазандық агрегаты мен №3 турбоагрегат күрделі жөндеуден өтіп жатыр. Сондай-ақ, отын қоры қалыптасып, 1 қыркүйектен бастап №1 және 2 жылу магистральдарын нығыздау және жуу жұмыстары басталады.
– Биыл қаржыландыру екі есеге жуық ұлғайды. Бұл қаражаттың едәуір бөлігі тұрғын үй-коммуналдық шаруашылық саласына бағытталады. Иә, бұл жұмыс үнемі көзге түспейді, бірақ, ол өте маңызды. Егер, желілерді қазір жаңартпасақ, ертең күрделі проблемаларға тап болуымыз мүмкін. Сондықтан, инженерлік желілерге ауқымды жөндеу жұмыстары жүргізілуде, – деді Ермағанбет Бөлекпаев.
Қалада инженерлік инфрақұрылым жүйелі түрде жаңғыртылуда. Магистральдық және орамішілік жылу желілерінің жалпы 23,8 шақырымының 14 шақырымы биыл ауыстырылған. Соңғы екі жылда 32 шақырым жылу құбыры жөнделіп, оның 25 шақырымы 2024 жылы жаңартылған. Нәтижесінде жылу желілерінің тозуы 75%-дан 65%-ға дейін төмендеген. Су құбырларын қайта жаңарту жобасы аясында соңғы екі жылда 44 шақырым су желісіне жаңа құбыр салынған. 2025 жылы тағы 22 шақырым құбырды ауыстыру көзделген, қазіргі уақытта оның 13 шақырымы толық аяқталған. Жоба 2026 жылы толық тәмамдалмақ. Кәріз жүйесіне де ерекше назар аударылып отыр. 2024 жылы облыстық бюджеттен бөлінген 2 млрд теңге есебінен кәріз коллекторының 7 шақырымы жаңартылды. 2025 жылы бұл жұмыс жалғасып, қосымша 1 млрд теңге бөлінбекші. Электр желілерін жаңғырту аясында биыл 12,3 шақырым желі жөнделіп, 8 трансформатор ауыстырылды.
Жол инфрақұрылымын дамыту бағытында 16 шақырымға созылған 10 көшеде орташа жөндеу жұмыстары жүргізілуде. Оның ішінде, тұрғындар тарапынан жиі көтерілетін мәселенің бірі – Шиліауыз орамына апаратын 2,5 шақырым жолдың жаңғыртылуы қолға алынды. Инженерлік желілері жаңартылған көшелерде асфальт төсеу, тротуар салу және жарықтандыру жұмыстары қатар жүруде. Атап айтқанда, Ағыбай батыр, Қадыржанов, Абай, Победоносцев, Спицын көшелерінде тиісті жұмыстар атқарылып жатыр. Қаланың аулаларын жаңарту бойынша биыл 11 аула кешенді түрде абаттандырылып, 10 балалар ойын алаңы мен 9 спорт алаңы қалпына келтірілуде. 94 көпқабатты үйдің шатыры мен қасбеттері жөнделуде. Бұл жұмыстар қыркүйек айына дейін толық аяқталады. Қоғамдық көлік аялдамалары мен қаланың сыртқы келбетін жақсарту үшін 34 аялдама павильоны, 16 LED экран орнатылуда. Қала аумағында 275 қоқыс контейнері жаңартылып, 55 контейнер алаңы абаттандырылуда.
Облыс әкімі Балқаш әуежайының жаңғыртылу барысымен де танысты. Ұшу-қону жолағы, рульдеу жолы, перрон толықтай жаңартылған. Жолаушыларға жайлы жағдай жасау үшін ішкі және сыртқы әрлеу, жылу, желдету, су жүйелері жаңартылған. Жаңғырту аяқталған соң әуежайдың өткізу қабілеті сағатына 80 жолаушыға дейін жетпек.
Туризмді дамыту бағытында 2024 жылы 2 демалыс аймағы мен 1 қонақүй іске қосылды. 2025 жылдың басынан бері тағы 3 демалыс аймағы салынып, 900 млн теңгеден астам инвестиция тартылды. 20-21 маусымда өткен «Балқаш Tourfest – 2025» фестиваліне 50 мыңнан астам адам қатысса, 4-7 шілде аралығында өңірге 60 мыңнан астам турист келген.
Әлеуметтік салаға ден қойылған
Қалада биыл «Жайлы мектеп» ұлттық жобасы аясында 900 орындық жаңа мектеп іске қосылады. Сонымен қатар, 3 мектеп пен 4 балабақшаға жөндеу жүргізіліп, Абай көшесіндегі балалар шығармашылығы орталығы жаңартылуда. Денсаулық сақтау саласында Балқаш қалалық көпбейінді ауруханасында ангиографиялық операция блогы мен қабылдау бөлімін кеңейту жұмыстары жүріп жатыр. Қалада денсаулық сақтау жүйесіне 17 жаңа дәрігер келіп, жыл соңына дейін тағы 27 маман тартылмақ.
– Қалада заманауи офтальмологиялық оталарды жүргізу мүмкіндігі жасалуда. Сонымен қатар, «Қазақстан халқына» қорының қолдауымен Травматология және ортопедия орталығы ашылады. Бұл орталық Балқашты өңірлік орталыққа айналдырады, – деді облыс басшысы Ермағанбет Бөлекпаев.
Жыл басынан бері жұмыспен қамту шараларымен 1800 адам қамтылып, 250 жас «Жасыл ел» бағдарламасына қатысқан. NEET санатындағы 431 жастың 169-ы жұмыспен қамтылған көрінеді. Жастарға жағдай жасалып, «Жас Спейс» жастар орталығы «Коунрад» корпоративтік қорының қолдауымен ашылып, жастардың бос уақытын тиімді өткізуіне жол ашуда.
Жұртшылықпен жылы жүздесу
Қала тұрғындарымен өткен кездесуде Ермағанбет Бөлекпаев пен қала әкімі Сапар Сатаев барлық қойылған сұрақтарға ашық әрі нақты жауап берді. Кездесу барысында тұрғын үй-коммуналдық шаруашылықты жаңғырту, аулалар мен көшелерді абаттандыру, жасыл желектерді күту мәселелерін талқылады. Аймақ басшысы тұрғындардың өзекті мәселелеріне жан-жақты көңіл бөлініп, бірде-бір мәселенің назардан тыс қалмағанын атап өтті. Мұндай кездесулер өңір басшысына халықпен тікелей байланыс орнатып, ұзақ жылдар бойы шешімін таппаған проблемаларды шешуге мүмкіндік береді. Өткен жылғы кездесуде 25 маңызды тақырып көтеріліп, оның 19-ы толығымен шешілген, ал, алтауы бойынша жұмыстар жалғасуда.
Қалада магистральды су құбырлары мен жылу желілерін күрделі жөндеу жұмыстары жалғасуда. Үйлердің қасбеттері мен шатырлары жаңартылып, жолдар мен аулалар абаттандырылуда. Сонымен қатар, жағалау аймағындағы жұмыстар да жалғасады.
– Жол мәселесінің шешімі инфрақұрылым желілерінің жағдайына байланысты кешігіп жатыр. Бірақ, біз балаларымыздың заманауи ойын алаңында ойнауын қалаймыз, – деді тұрғындар. Бұл сауалға Балқаш қаласының әкімі Сапар Сатаев жауап берді.
Тұрғындар жеке секторда бақшаларды суару үшін есептеуіштер орнату және қала көшелеріндегі автосуару мәселесін де көтерді.
– Қазіргі таңда төрт көшеде автосуару қалпына келтіріліп, тамшылатып суару жұмыстары жүргізілді. Келесі жылы көгалдандырылатын барлық көшелерде желкенді және тамшылатып суару жүйелері енгізіледі, – деді қала әкімі.
Кездесу қорытындысында аймақ басшысы тұрғындардың ұсыныстары мен сұрақтарын ескере отырып, қала инфрақұрылымын дамыту бағытындағы жұмыстарды әрі қарай жалғастыра беретінін жеткізді.
– Қаламызға Сапар Сатаев мырза келгелі оң өзгерістер орын ала бастады. Халықпен тең сөйлесуі, мұң-мұқтажымызды тыңдап, қаламызды көркейтіп жатқаны көңілімізден шығады. Көп жылдан бері тозып тұрған су құбырлары айырбасталуда. Оған бек қуаныштымыз, – деді қала тұрғыны Ғабит Жақыпов.
Ол, сонымен қатар, Ленин мен Абай көшелеріне бағдаршам орнату, қорғасын зауытының экологиялық зияны, Саяқ кентіне көңіл бөлу секілді маңызды мәселелерді көтерді.
Кездесу соңында облыс әкімі Ермағанбет Бөлекпаев тұрғындарды жеке қабылдап, барлық көтерілген мәселелер бойынша нақты шаралар іске асатынын айтты.
Нұрдос КӘРІМ,
«Ortalyq Qazaqstan»
БАЛҚАШ
