«Үздік тәжірибе» үмітті ақтай ма?
Қарағанды қаласының №3 емханасы базасында алғашқы үздік тәжірибелер орталығы ашылды. Бұл өңірдің денсаулық сақтау жүйесін реформалауда нақты қадам болды. Себебі, оны іске асыру арқылы емхана жобалық басқаруға көшті. Соның арқасында медициналық қызметтердің сапасын едәуір жақсартуға және халық үшін көмектің қолжетімділігін арттыруға мүмкіндік пайда болды.
Емхананың бірінші қабатында заманауи, ыңғайлы және көпфункционалды қабылдау блогы құрылды. Тіркеу сөресі әртүрлі санаттағы азаматтарға ыңғайлы қызмет көрсету үшін аймақтарға бөлінген. Сонымен қатар, даулы мәселелерді шешу үшін тіркеушіден қадамдық қолжетімділікте пациенттерді қолдау және медициналық қызмет көрсету сапасын ішкі бақылау қызметі бар. Мұндағы жұмыс «осында және қазір» қағидаты бойынша жұмыс істейді.
Пациенттерді қолдау және ішкі бақылау қызметіне 2023 жылы – 1 703, 2024 жылы – 1 873 өтініш түскен. Ақпарат, қоғамдық бақылау және кері байланыс механизмін енгізу сыртқы шағымдар санын төмендетті. Тіркеушіге жақын жерде қоғамдық қабылдау бөлмесі орналасқан, онда әрбір пациент емханаға тіркелу туралы толық ақпарат, сақтандырылу мәртебесін тексере алады және міндетті әлеуметтік медициналық сақтандыру бойынша кеңес ала алады.
Мүмкіндігі шектеулі жандар үшін қолжетімді инфрақұрылым құрылды. Атап айтқанда, емхананың кіреберісінде тактильді жол орнатылған. Науқасты халықпен жұмыс жөніндегі әкімші қарсы алады, содан кейін оны тактильді жолмен қоғамдық қабылдау бөлмесіне апарады. Қажет болған жағдайда пациент медициналық көмекпен бірге, әлеуметтік қызметкердің сүйемелдеуімен диагностикадан өте алады.
Үздік тәжірибе орталығында көпсалалы командаларды енгізу медициналық қызметтердің сапасын едәуір жақсартты. Әр командада отбасылық дәрігер, әлеуметтік қызметкер, психолог, акушер және бірнеше медбике бар. Олар профилактикалық тексерулер жүргізеді, денсаулыққа қауіп төндіретін және физикалық, психоэмоционалды және әлеуметтік мәселелерді шешеді. Бұл командалар пациенттерге жан-жақты көмек көрсетуге мүмкіндік беретін жергілікті өзін-өзі басқару органдарымен, дағдарыс орталықтарымен және басқа ұйымдармен белсенді жұмыс істейді.
Орталық жұмысының маңызды элементі – медицина қызметкерлерінің біліктілігін арттыру. 2023 жылы дәрігерлерге, медбикелерге, әлеуметтік қызметкерлер мен психологтарға арналған тренингтер циклі өткізілді. Нәтижесінде №3 емхананың 146 қызметкері оқудан өтті. Жаңа білім мен жұмыс әдістері қызмет көрсету сапасын арттыруға және инновациялық тәсілдерді енгізуге көмектеседі.
Орталықта бірнеше әлеуметтік жобалар әзірленіп, енгізілді. Олардың ішінде «Науқастың көзімен алғашқы 5 минут», «Дұрыс тамақтану мектебі», «Ерлердің денсаулығын ұзарту», сондай-ақ, «Сүт безі обырын ерте анықтау» және «Инсульттің алдын алу» жобалары бар. Бұл бастамалар халықты хабардар етуге және осы аурулардың алдын алу процесіне тартуға бағытталған.
Үздік тәжірибе орталығы – пациенттердің жоғары тиімділігі мен қанағаттанушылығына қол жеткізу үшін инновациялық тәсілдер мен дәстүрлі жұмыс әдістерін біріктірудің жарқын мысалы. Үздік тәжірибелер орталығы жұмысының оң нәтижелері қазірдің өзінде байқалады. Емханаға келушілер саны 12,1%-ға, ал, профилактикалық тексерулер бағдарламасына тартылған пациенттер саны 11%-ға өсті. Бұл өзгерістердің барлығы пациенттің ыңғайлы, қолжетімді және қажеттілікке бағытталған ортасын құру арқылы мүмкін болды.
Денсаулық сақтау саласына халықтың сенімі – «Халық кеңесі» де бар орталықта. Кеңестің үш отырысы өтті. Оның мүшелері емхана маңындағы ұзындығы 700 метр жылу магистральдық траншеясын жабу, автокөліктерді қоюға арналған орын ашу мәселелерін көтеріп, шешілуіне атсалысты. Нәтижесінде, қосымша тұрақ алаңына орын табу және ерекше қажеттіліктері бар пациенттер үшін жағдайды жақсарту сияқты мәселелер шешілді.
Тағы бір маңызды жаңалық – пациенттерге жоғары білімі бар мейірбикелік қызметтерге қол жеткізуге мүмкіндік беретін тәуелсіз мейірбикелік практика орталығының ашылуы. Бұл мамандар медициналық қызметтердің кең спектрін ұсынады. Соның ішінде, жұқпалы емес аурулары бар науқастарды қабылдау, мейірбикелік іс-шаралар жоспарын құру, созылмалы ауруларды бақылау, жүкті және қарт адамдарға қамқорлық жасау, денсаулықты нығайту және аурудың алдын алу жұмыстарын ұйымдастыру.
Жалпы, орталық жұмысының нәтижелеріне тек жергілікті тұрғындар ғана емес, басқа аймақтардың мамандары да қызығушылық танытуда. №3 емхананың базасында облыстың және басқа өңірлердің медицина қызметкерлері оқудан өтті. Бұл жобаның табыстылығын және оның Қазақстанның денсаулық сақтау саласын дамытудағы маңыздылығын айғақтайды. Үздік тәжірибелер орталығының мақсаты медициналық көмектің қолжетімділігін жақсарту ғана емес, сонымен қатар, медициналық мекемелерге деген сенімді арттыру, әлеуметтік бағдарламаларды дамыту және әрбір пациенттің денсаулық мәселелерін шешуге кешенді көзқарас болып табылады. Алдағы уақытта жаңа жобалар енгізу жоспарланған. Бұл халықпен одан да тиімді жұмыс істеуге және медициналық қызметтердің жоғары сапасын қамтамасыз етуге мүмкіндік береді.
Сәния БОРАНҚҰЛОВА,
Қарағанды қаласының №3 емханасы директоры
Суреттер емханадан
