Құқық білгірлері
Қарағанды облысындағы колледж студенттері арасында “Біртұтас тәрбие” бағдарламасын іске асыру және “Әділдік пен жауапкершілік”, “Заң және тәртіп” білім беру триадасының құндылықтарын насихаттау аясында іскерлік ойын өтті.
Оны Қарағанды облысының білім беруді дамытудың оқу-әдістемелік орталығы мен Әбілқас Сағынов атындағы Қарағанды техникалық университетінің Инновациялық технологиялар колледжі ұйымдастырды.
Іс-шара жастар арасында құқықтық сауаттылықты арттыру, заңдарды түсіндіру және қоғамдық тәртіпті сақтау қажеттілігін көздеді.
Іс-шараны ашқан Инновациялық технологиялар колледжінің директоры Нұрбіби Смағұлова қабылданған бағдарламаны іске асырудың және заңдарды білудің маңыздылығын атап өтіп, қатысушыларға сәттілік тіледі. Іскерлік ойынды гуманитарлық және әлеуметтік пәндер оқытушысы, заң ғылымдарының магистрі Гүлжазира Өмірбекова және тәрбие ісі жөніндегі директор орынбасары Әсел Тәкенова жүргізді.
Ойын мемлекеттік және орыс тілдерінде жүргізілді. Оған Қарағанды облысынан 25 құқықтық емес мамандықта оқитын колледж командалары қатысты.
Іскерлік ойынның нәтижелерін беделді қазылар алқасы бағалады, олардың арасында қоғамдық құқықтық тәртіпті қорғау, сыбайлас жемқорлыққа қарсы департаменттің түсіндіру пулының өкілдері, заң пәндерінің оқытушылары болды.
Ойын қорытындысы бойынша жеңімпаз командалар анықталды.
Мемлекеттік тілде:
1 орынды «Bolashaq» Қарағанды жоғары колледжі иеленді;
2 орын – Әбілқас Сағынов атындағы ҚарТУ-дың Инновациялық технологиялар колледжі;
3 орын – Қазтұтынуодағы Қарағанды экономикалық университетінің экономика, бизнес және құқық колледжі.
Орыс тілінде:
1 орынды Абай Құнанбаев атындағы Саран жоғары гуманитарлық-техникалық колледжі иеленді;
2 орын – Қарағанды жоғары медициналық интерколледжі;
3 орын – Академик Қ. А. Сағынов атындағы колледж-мектеп.
Жеңімпаздар I, II және III дәрежелі дипломдармен марапатталды, сондай-ақ Инновациялық технологиялар колледжінен естелік сыйлықтар алды. Барлық қатысушыларға білім беруді дамытудың оқу-әдістемелік орталығының сертификаттары табыс етілетін болады.
Материалды әзірлеген Аида РАХЫМҚҰЛОВА
