Умар Имендинов әлем чемпионатында төртінші рет жеңіске жетті

Қарағандылық спортшы Умар Имендинов АҚШ-тың Техас штатындағы Даллас қаласында грэпплингтен NAGA (North American Grappling Association) әлем чемпионатында жеңіске жетіп, чемпион атағын төртінші рет қорғай білді деп хабарлайды Ortalyq.kz облыс әкімдігіне сілтеме жасап.

Жарысқа әлемнің әр елінен шамамен 1600 спортшықатысты. Умар жарыс барысында үш жекпе-жекте қарсыластарынан айқын басымдықпен өтіп, финалда да жоғары нәтиже көрсетті.  

– Чемпионаттан алған әсерім ерекше. Төрешілік әділ өтті. АҚШ-та бұған дейін де бірнеше рет күрескенмін, сол себепті ортаға тез бейімделіп, қиындық болмады, – дейді спортшы. 

Имендинов жақында 10 жылға жуық уақыттан бері спортпен шұғылданады. Ол MMA бойынша кәсіби файтер, спорт шебері атағына ие. Оның жарыс жетістіктеріне – бразилиялық джиу-джитсу бойынша үш әлем чемпионы атағы, грэпплингтен Қазақстан чемпионаттарында 6 алтын медаль, сондай-ақ панкратион, no-gi джиу-джитсу және қоян-қолтық ұрыс бойынша бірнеше жеңістер кіреді. 

Алғаш рет Умар грэпплингтен NAGA әлем чемпионатында 2020 жылы алтын медаль алған, кейін 2024 жылы екі мәрте чемпион атанып, биыл да атағын сәтті қорғады.

Жамал АКПАРОВА