Әуе толқынында – «Buketov Radio»
Студенттік «Buketov Radio» 2021 жылы Е.Бөкетов атындағы Қарағанды зерттеу университетінің бас ғимаратында ашылды. Биыл студенттер сұрауы бойынша филология факультетінің 85 жылдығына орай, университет ректоры – Нұрлан Дулатбеков радионы №8 ғимаратқа ауыстырды.
Білім алушылар мен жас журналистер үшін радионың орны ерекше. Сабақ уақытынан тыс, қоңырау кезінде студенттер күнделікті университет жаңалықтарынан хабардар бола отырып, әсем ән тыңдай алады.
Жас журналистер үшін алғашқы тәжірибелерін танытуда радио студиясының маңызы зор. Оқу ордасына келген құрметті қонақтармен сұхбат жүргізу, ұстаздармен тың тақырыптарда әңгіме өрбітумен қатар креативті идеяларын жүзеге асырады.
– Бүгінде бұқаралық ақпарат құралдары адамның тұлғалық және кәсіби дамуына үлкен ықпал ететін тиімділігі жоғары әлеуметтік институттар болып табылады. Сондай ақпарат құралдарының бірі – студенттік радио. Университетімізде BUKETOV радиосының жұмыс істеп тұрғанына 3 жыл болды. Бұл – Қарағанды облысындағы алғашқы форматты студенттік радио. Студенттік радио әркім өз көзқарасын білдіретін, ойымен бөлісетін, өмірлік ұстанымын қалыптастыратын, университет студенттерін біріктіретін медиа алаңға айналды, – деді журналистика кафедрасының меңгерушісі Жанар Рамазанова.
Осы уақытқа дейін студияда бірнеше танымал жандармен сұхбат өтті. Алғашқы қонақ оқу ордамыздың ректоры – Нұрлан Дулатбеков. Сондай-ақ, әнші – Максим Ержан, Франция еліне аты танымал суретші – Алмагүл Меңлібаева, веломорофоншы Ернат Мелсұлы сынды тұлғалармен, әңгіме өрбітіп, оқу ордамыздың белсенді студенттері, Парламент депутаттарымен сұхбат жүргізілді.
Ақнұр МАРАТ,
Е.Бөкетов атындағы Қарағанды зерттеу университеті журналистика бөлімінің ІІ курс студенті.
