Цифрлық нарыққа жол ашық
Қарағанды облысы әкімдігі мен отандық Teеz маркетплейсі арасында өзара серіктестік пен электрондық сауданы дамытуға бағытталған ынтымақтастық туралы меморандумға қол қойылды. Бұл құжат жергілікті кәсіпкерлердің цифрлық сауда алаңына кеңінен шығуына жол ашады. Қазірдің өзінде ол жерде 40-қа жуық қазақстандық тауар өндіруші тіркелген.
– Қарағандыда маркетплейстің ашылуымен жергілікті тауар өндірушілер үшін үлкен мүмкіндіктер пайда болды. Біз бастапқыда отандық өнімді ілгерілету және қолдау туралы келістік. Бірге жұмыс істейтін боламыз. Ең алдымен, бұл өңірде жаңа жұмыс орындарын ашу, – деп атап өтті облыс әкімі Ермағанбет Бөлекпаев.
Teez маркетплейсі бірегей үлгімен ерекшеленеді, онда барлық тауар Қарағандыдағы бір орталық хабта орналасқан, осы жерден өңделеді және бүкіл Қазақстан бойынша бір күнде жеткізіледі.
Teez компаниясының негізін қалаушы Линар Хуснуллин «Қарағанды – Қазақстанның электрондық сауда орталығы» атты ауқымды жобаны таныстырды.
– Қарағанды – осындай бизнес үшін тамаша орын. Жергілікті жеткізушілермен ынтымақтастықты дамыту маңызды, – дейді кәсіпкер.
Ол «Қазақстанда жасалған» маркасымен тауарларды сату және ілгерілету үшін көзделген арнайы шарттар туралы айтып берді. Бұл – ерекше іріктеулер, төмендетілген комиссия, жеңілдікпен жылжыту.
Жоба қазақстандық кәсіпкерлерді электрондық коммерцияға оқыту және қоғамды құру бойынша ауқымды бағдарламаны қамтиды. Мультиплатформалық конференциялар ұйымдастырылады, біріншісін 23 сәуірде өткізу жоспарланған. Селлерлер мен өндірушілердің өзара іс-қимылы үшін коворкинг-клуб ашылады.
Меморандум аясында облыстағы шағын және орта бизнес өкілдеріне Teеz платформасында тіркеліп, өз өнімдерін онлайн сату мүмкіндігі ұсынылады. Сонымен қатар, кәсіпкерлерге маркетинг, логистика, цифрлық құжат айналымы және төлем жүйелері бойынша кешенді қолдау көрсетілмек.
– Бүгін қол қойылған меморандум осы электрондық алаңда біздің жергілікті тауар өндірушілеріміздің барынша көп қатысуы бағытындағы жұмысты айқындайды. Бүгінгі таңда Қазақстанда жасалған 38 тауар маркетплейс алаңында сатылады. Бұл – тек бастама. Тұрмыстық химиямен айналысатындар, ұлттық киімдерді ұсынатындар бар. Қазір қайта өңдеушілер бойынша жұмыс жүргізілуде, – деді облыстың кәсіпкерлік басқармасының басшысы Ирина Любарская.
Teеz – Қазақстанда дамып келе жатқан ұлттық маркетплейстердің бірі. Платформада азық-түлік, тұрмыстық техника, киім-кешек, тұрмыстық химия және тағы басқа көптеген тауар түрлері онлайн сатылады.
Енді Қарағанды облысының фермерлері, қолөнершілері, тұрмыстық тауар өндірушілері мен стартап иелері өнімдерін бүкіл Қазақстанға онлайн сата алады.
Teеz.kz платформасымен ынтымақтастық – өңірдің кәсіпкерлері үшін жаңа нарықтарға жол ашады. Енді қарағандылық өнімдер еліміздің түпкір-түпкіріне жеткізіледі. Ал кәсіпкерлер заманауи сауданың барлық тетіктерін меңгеруге мүмкіндік алады.
Салтанат ІЛИЯШ,
«Ortalyq Qazaqstan»
Суретті түсірген Жангелді ӘБДІҒАЛЫМ
