Өткен тәулікте Қарағанды облысының автожолдарында 200-ден астам адам құтқарылды

Өткен тәулікте Қарағанды облысының автожолдарынан 200-ден астам адам құтқарылды және эвакуацияланды. Өңір аумағында дауыл туралы ескерту жарияланды.

3 қаңтар күні сағат 12:30-дан бастап 80 жеңіл автокөлік қар құрсауында кептеліп қалды. Жақын елді мекендерге 202 адам, оның ішінде 43 бала құтқарылды және жеткізілді. Құтқарылғандар медициналық көмекті қажет етпеді. Апаттық-құтқару жұмыстарына ТЖД, жергілікті полиция қызметі, жергілікті атқарушы органдар мен жол қызметтері жұмылдырылды.

Ақтау кентінен құтқарушылар жоғары өтімді техникамен үш жүкті әйелді эвакуациялады. Әйелдер Теміртауға жеткізілді.

Қарағанды облысының аумағында дауылды ескерту жарияланды. Қазіргі уақытта ауа-райының нашарлауына байланысты (боран, қалың қар, көрінудің шектелуі) Қарағанды – Балқаш, Қарағанды – Астана, Қарағанды – Жезқазған, Қарағанды – Павлодар, Қарағанды – Қарқаралы бағыттарындағы трассалар жабылды.

Бекеттер ұйымдастырылды, онда 80 техника бірлігінде 167 адам жолдың ашылуын күтіп отыр.

ТЖ департаменті елді мекендерден тыс жерлерге бармауға, автожолдардың жабылған учаскелерінде көлік құралдарының кептелісін болдырмауға және мүмкіндігінше елді мекендерде, кемпингтерде, жол бойындағы дәмханаларда күтуге қатаң кеңес береді.

Ауа-райының өзгеруі және автожолдардың жай-күйі туралы жедел ақпарат «Дәрмен» мобильді қосымшасында, ТЖД-ның әлеуметтік желілердегі ресми парақшаларында қолжетімді.

Барлық оқиғалар мен ТЖ фактілері туралы мына телефондарға хабарласуға болады: 112 немесе (8-7212) 43-36-36, 43-37-37.

Қарағанды облысы ТЖД баспасөз қызметі.