Теміртаудағы оқиға: барлық кінәлілер жауапкершілікке тартылады
Бүгін облыс әкімінің орынбасары Әлібек Әлденей Қарағанды облысы бойынша кәмелетке толмағандардың істері және олардың құқықтарын қорғау жөніндегі комиссияның отырысын өткізді.
Теміртау қаласы әкімінің әлеуметтік мәселелер жөніндегі орынбасарына кәмелетке толмағандарға тиісінше бақылау жасамағаны үшін қатаң сөгіс жарияланды.
– Жасөспірімдер оқыған мектеп директорларының орынбасарлары тәртіптік жауапкершілікке тартылды. Біз жасөспірімдер агрессиясына сөзсіз алаңдаймыз және болашақта осындай оқыс оқиғаларды азайту бойынша қосымша шаралар әзірлеуге кірісеміз. Барлық кінәлілер қолданыстағы заңнама шеңберінде жауапкершілікке тартылады. Бұл оқиға бойынша полиция тергеу жүргізуде. Ата-аналардан, педагогтардан балаларды тәрбиелеуге және олардың басқа адамдарға құрметпен қарауын, дұрыс құндылықтарды қалыптастыруға көбірек көңіл бөлуді сұраймын. Біз өз тарапымыздан жасөспірімдерді әлеуметтік қолдау мен алдын алу шараларын күшейту жұмыстарын жалғастырамыз, – деді облыс әкімі Ермағанбет Бөлекпаев.
Естеріңізге сала кетейік, Теміртауда бір топ жасөспірім жалғызбасты зейнеткердің үйіне кіріп, аяусыз ұрып-соғып, тонап кеткен болатын. Олар зейнеткерге қатысты жасаған қорлықтарын видеоға түсіріп, оны достарына және таныстарына таратқан.
Аида РАХЫМҚҰЛОВА,
Ortalyq.kz
