Теміртау қаласының ішкі саясат бөлімінің ұйымдастыруымен Жеңістің 80 жылдығына арналған патриоттық ән және көркем сөз байқауы өтті. Байқауға 12-17 жас аралығындағы оқушылар қатысты. Қатысушылар батырлар ерлігіне арналған әндер шырқап, рухқа толы әсерлі өлеңдер оқыды. Әрбір қатысушы сахнада үлкен тебіреніспен өнер көрсетіп, көрермендердің қошеметіне бөленді. Батырлардың рухына арналған терең мазмұнды жырлар мен сырлы әндер көрермендер жүрегінен орын тапты.
Байқаудың негізгі мақсаты — өскелең ұрпақты батырлық пен ерлікке баулу, Отан қорғаған бабаларымыздың ерлігін ұлықтау, жастардың патриоттық сезімін ояту.
Іс-шара соңында жеңімпаздар мен белсенді қатысушылар алғыс хаттармен және арнайы сыйлықтармен марапатталды. Мұндай байқаулар жастардың тарихи санасын қалыптастырып, олардың бойындағы ұлттық рухты оятуға бағытталған маңызды бастама.
