Жасыл желектерді күтіп-ұстау, қоқыс қалдықтарын сұрыптау және қайта өңдеу бойынша жаңа жобалардан бастап, таза табиғат, эко-челленджер және т.б. жұмыстар облысы бойынша «Таза Қазақстан» экологиялық акциясының тұжырымдамасын қамтиды. «Таза Қазақстан» тұжырымдамасы экологиялық мәдениетті дамытудың әртүрлі әдіс-тәсілін қамтитын кешенді әдісті қарастырады. Оны жүзеге асыру бойынша іс-қимыл жоспарын облыстық мәслихат депутаттары кезектен тыс XXV сессияда бекітті.
– Әзірленген тұжырымдама үш бағытты қамтиды. Экологиялық ойлау және мінез-құлық, соның ішінде ынталандыру және оларды көтермелеу шаралары, экологиялық білім, экологиялық білім және ақпараттық насихат бағыттары. Барлығы 48 іс-шара нақты мерзімдерімен және орындаушылармен белгіленген. Жоспарда экологиялық мәдениетті дамытудың түрлі әдістері мен тәсілдерін қамтитын кешенді тәсіл қарастырылған, – деп түсіндірді Табиғи ресурстар және табиғат пайдалануды реттеу басқармасының басшысы Бахтияр Санбаев.
Ол негізгі іс-шараларды атап өтті. Олардың қатарында қалдықтарды сұрыптау және қайта өңдеу бойынша инфрақұрылымдық жобаларды іске асыру, қалалар мен аудандарды, сондай-ақ кәсіпорындар мен ұйымдардың аумақтарын көгалдандыру бар. Жасыл желектерді түгендеу бүкіл өңір бойынша жүргізілуі тиіс. Облыста атмосфералық ауа жағдайының мониторингі бойынша автоматтандырылған бекеттер санын арттыру жоспарлануда. Экологиялық құқық бұзушылықтарды тіркеуге арналған камералар да қосылады.
Жоспар табиғи ресурстарға ұқыпты қарауды, үнемді тұтынуды қалыптастыруға бағытталған ауқымды ағартушылық жұмысты қамтиды.
Облыстық «ЭкоFEST» фестивалі, сондай-ақ жеңімпаздарды көтермелейтін «Үлгілі ауыл», «Таза аула – таза қала/аудан» конкурстары өткізіледі.
Естеріңізге сала кетейік, Мемлекет басшысының тапсырмасымен Үкімет 2024–2029 жылдарға арналған «Таза Қазақстан» экологиялық мәдениетін дамыту тұжырымдамасын бекіткен болатын. Қарағанды облысында үкіметтік құжат негізінде өңірлік тұжырымдама мен іс-қимыл жоспары әзірленді.
Аида РАХЫМҚҰЛОВА
