24 қаңтар күні Қазақстанда жоспарлы профилактикалық жұмыстарды жүргізу үшін телеарналар мен радиостанциялар хабар таратуды уақытша тоқтатады. Осыған байланысты Қазақстанның барлық аумағында телерадиоарналарды ретрансляциялау уақытша тоқтатылады. 

«Қазтелерадио» АҚ үздіксіз және сапалы телерадио хабар таратуды қамтамасыз ету мақсатында тоқсан сайын жерсеріктік, цифрлық және аналогты эфирлік желілердің техникалық құралдарында сервистерді жаба отырып, жоспарлы профилактикалық жұмыс жүргізеді.

Сообщение Елімізде телеарналар мен радио уақытша өшіріледі появились сначала на «ORTALYQ QAZAQSTAN» газеті.

РЕДАКЦИЯДАН

«Әзілің жарасса, атаңмен ойна», – деген халқымыз. Егер, қисыны келіп жатса, неге әзілдеспеске?! Бірақ, жөні осы екен деп шек­тен тыс шықпаған да дұрыс.
…Өткен ғасырдың 85-жылдары болатын. Қазір Астана қаласында тұратын зейнеткер, белгілі тележурналист, Қазақ­стан Журналистер одағы сыйлығының лауреаты Дәния Омашева ол кезде Қарағанды телевидениесінде аға редактор еді. Екеу­міз бір бөлмеде отырамыз. Арамыздағы жалғыз телефон кенет шыр ете қалды. Аз-кем әңгімеден соң тұтқаны қойып жатып:
– Көптен реті келмей жүр еді, қатырдым оны! – деп, сылқ-сылқ күлді.
– Не болды, айтсаңызшы? Біз де бірге күлейік, – дедім қарап отырмай.
– Кейін естірсің, – деп құтылды.
Сәлден соң «Жас қанат» хабарын жазып, бөлмеме кірсем, Дәкеңнің көңіл-күйі көтеріңкі екен. Сөйтсем, бірер сағат бұрын мұғалімдер білімін жетілдіру институты­нан құрбысы, ұлағатты ұстаз, әрі жеңгесі Сара Мұқанова:
– Қыз-ау, Қалмағанбетовтің жұмыс телефонын айтшы? – депті.
Дәния болса, «Жаңалықтар» редакция­сының редакторы, соғыс ардагері Шамшит Қалмағанбетовті меңзеп тұрғанын іштей біле тұрып, оған фамилиясы ұқсас Қарағанды облыстық партия комитетінің екінші секретары (қазіргі үрдіспен айт­қанда, облыс әкімінің орынбасары) Жәлел Қалмағанбетовтің жұмыс телефонын бер­ген ғой. Апамыз болса, оны біл­мейді, әлгі жазып алған «телефонға» ізін суытпай хабарласады.
– Қалмағанбетов қайда? – деп сұрапты салған беттен.
– Кешіріңіз, Қалмағанбетов обкомның бюросында, жиналыста отыр, – дейді хатшы қыз. Шамшит ағамызбен әрдайым әзілі жарасып, әрі жездесі ретінде қалжыңдасатын Сара апамыз, телефон тұтқасын қойып жатып:
– Бюродан шыққан соң, мен оны бұйралатамын! Солай деп айтқын! Қарай гөр, өзі «шұғыл телефон соқсын» дейді де, менің қоңырауымды тоспай жиналысқа кеткені қалай?! Шыққаннан кейін міндетті түрде ма­ған хабарлассын! Айтқын, Сара Балқашов­на звондады, телефоны мынау! – деп сес көрсете сөзін аяқтапты.
Содан «Апам да аң-таң, өзім де аң-таң!» – демекші, өмірі ондай өктем сөзді естімеген ақ үйдің хатшы қызы тосын жағдайға тосыр­қай қарайды. Арада жарты сағаттай уақыт өтеді. Әлгі «Қалмағанбетов» хабарласпаған соң, Сара апамыз оған «сыбағасын» берейін деп қайтадан телефон соғыпты.
– Әлгі шал, әлі жиналыстан шыққан жоқ па?! Ол онда не істеп жатыр? Жоқ, әлде менің сөйлейтін сөзімді жазып отыр ма? – деп мәселені көлдеңінен бір-ақ қойған кө­рінеді.
– Кешіріңіз, Жәлел Шубаевичке айтып едім, ол «сізді танымаймын, ондай кісіге телефон шалсын деп айтқаным жоқ», – деді. Сондықтан, хабарласпады.
– Танымағаны қалай, есі дұрыс па?! Қалқам-ау, ол өзі аты-жөнін өзгертіп, секретарша алған ба?! Түсінсем бұйырмасын!?..
– Кешіріңіз! Сіз қайда, кімге телефон соғып тұрсыз? – депті мәселенің мән-жайын білгісі келген хатшы қыз.
– Облыстық телевидениеге… редактор Қалмағанбетовке!..
– Кешіріңіз, сіз қателесіп тұрсыз! Бұл, телевидение емес. Облыстық партия комитетінің екінші хатшысы Қалмағанбетовтің қабылдау бөлмесі.
– Ой, не… е… е… дейді!.. Құдай-ау!.. Кешір, қалқам, кешір!.. Мен телеарнаның «Жаңалықтар» редакциясындағы редактор Қалмағанбетовке звондап отырмын! – деп Сәкең сасқанынан телефон тұтқасын қоя салыпты. Сол кезде барып, «тосын» жағдайдың тұзағына қалай түскенін, құрбысы Дәнияның қалжыңынан соң, бірақ білген ғой. Аталмыш оқиғаның мән-жайын телефоннан естіген Дәкең рахаттана күліп отыр.
– Подруга, «терме тезек, келер кезек» – деген осы! Бірінші сәуір – күлкі күні мені «жақсылап» алдап едің, енді өзіңнен көр! «Қалмағанбетов, Қалмағанбетов…» – деп қылқылдап қоймаған соң «обком партияда бір шаруасы болған шығар» дедім де, бас­тықтың телефонын бергенім рас. Одан да редактор Шамшит Қалмағанбетовтің аты-жөнін ашық айтпайсың ба? – деп, қалжың сөздің қайырмасын қайталап, екеуі тағы да телефон арқылы біраз уақыт күлкісін тыя алмады.
Шіркін-ай! Өмірде осындай әдемі әзілдердің болғанына не жетсін!

Әли ТОЙЖІГІТ,
Қазақстанның Құрметті журналисі

Сообщение «Маған Қалмағанбетов керек!» появились сначала на «ORTALYQ QAZAQSTAN» газеті.

Әңгіме неден шықты?

Әжем таңмен таласа тұрып, ұлттық арнадан «Таңшолпанды» тамашалайды. Бар ермегі – теледидар. Арасында немерелеріне «Балапан» арнасын қосып беретіні болмаса. Ал, күндіз сағат тілі 12.00-ге жеткеннен бастап 15.00-ге дейін «Қалаулымнан» көзін бір алмайды. Шекеге кетсе, үйдегі жеңгеме «сен тапжылмай көр, сосын бүге-шігесіне дейін айтып бересің» деп тапсырма беріп кететінін қайтерсің?! Сөйтіп, дастархан басында бәріміз Аша ханымның ток-шоуын тамашалап отырып, түстенеміз.

– Әже, неменеге уақытыңызды жоғалтасыз? Бұл жерде отырғандардың бәрі әртіс. Көруге тұрарлық дүние көрсеңізші. Осылардың махаббаты сізге не керек? – дедім тартыншақтап.

– Әй, сен не білесің? Бұл жерде шынайы бәрі. Үзбей көріп келе жатқан мен білемін, – деп дес бермейді. Үлкен кісінің әдеті ғой.

«Евразия» арнасындағы ток-шоу аяқталған соң, «КТК» дағы «Кел, келінім» бағдарламасын көру үшін жайғаса кетеді. Сөйтіп, көк жәшік алдында алтындай уақытын парықсыз дүниелерге сарп етеді. Себебі, аңқылдақ әжем оларға күмәнсіз сенеді. Әңгіменің түп төркіні – осында.

Ашығын айтқанда…

«Qareket», «Дара жол», «Мәселе», «Тарих. Тағдыр. Тұлға» атты бағыты барынша салмақты бағдарламалар көзі ашық көрерменнің көзайымына айналған. Себебі, аталмыш жобалардың мақсаты – ұлттық мүдде. Ал, мән-маңызына көзіқарақты көрермен баға беріп те қойған шығарсыздар…

Ал, «Қалаулымның» қалауы не? Жастардың жасанды махаббатын жалпақ жұртқа жария етуі бер жағы ғана… Ер жігіттердің сөз саптауы экран сыртындағы көрерменге ерсі көрінгені былай тұрсын, мақал-мәтелді орынсыз қолдануы құлаққа түрпідей тиеді.

Бағдарламаның «Youtube» желісіндегі нұсқасының жарияланған ең көп таралымы – 1,1 миллион қаралым. Бұл әлеуметтік желідегісі ғана. Ал, экран арқылы тамашалайтын көрермен саны бұдан да көп.

«Кел, келінім» бағдарламасын көрсеңіз, «Қалаулымым» айналайын екен ғой» дерсіз… Бұл тележоба – әдет-ғұрпымызды, салт-дәстүрімізді кемтар етіп танытып жатқан алаңның дәл өзі. Желіде таралған бейне аталмыш бағдарламаның бір ғана кемшіл тұсын әшкереледі. Айта кетсем, сегіз қыздың ішінен сыңарын іздеп келген ер-азаматтар төрт түліктің төлі қалай аталатынын білмей, жаға ұстатқан. Енді біреуі әйгілі Мұхтар Әуезовтің «Абай жолы» романын Жамбыл Жабаев жазған деп қынжылтқаны тағы бар.

Қазақ «ұлтыңды сақтаймын десең, қызыңды тәрбиеле» деген. Біздің де аталы сөзден асып айтарымыз жоқ. Жоғарыдағы жобалардың арты жақсылыққа әкелмесі анық.

Пікірге құлақ түрсек…

Арқаның аймаңдай ақыны, филология ғылымдарының докторы, профессор Аманжол Әлтай:

– Эстетикалық талғамы төмен, тәрбиелік мәні жоқ «Қалаулым», «Кел, келінім» сияқты бағдарламалардың қоғамның интеллектуалдық өсуіне, рухани қабілетінің артуына ешқандай әсері жоқ. Керісінше, бүгінгі қоғамның рухани өсуіне емес, өшуіне қызмет етіп жатқан бағдарламалар. Әсіресе, ауыл халқының ой-санасының көмескіленуіне, ішкі интеллектуалдық деңгейінің төмендеуіне әсер етіп жатыр сапасыз жобалар. Кешегі біздің бала кезімізде ауылда қой, жылқы бағып жүрген ағалардың, ақсақалдардың саптама етігінің қонышында «Жұлдыз», «Жалын» журналдары жүретін. Теледидардан Сағат Әшімбаевтың, Ақселеу Сейдімбектің ұлт санасының өсуіне ықпалы зор, тәрбиелік мәні бар бағдарламаларын көріп, талқылап отыратын. Енді, көңілді алаңдататын бір жайт бар. Ауылдағы үлкен апаларымыз, ақсақалдарымыз сапасыз бағдарламаларды жүйелі көретін болыпты, – дейді.

Ол өз пікірін телеиндустрия бағдарламалары ұлтты тәрбиелеуге, қоғамға ой салуға, рухани қабілетіміздің артуына қызмет етуі керек деп түйіндеді.

Аймақ арналары не дейді?

Өздеріңізге белгілі облыстық «SARYARQA» телеарнасында байыпты бағдарламалар жоқ емес. Атап өтсек, «Ой-талқы» бағдарламасы маңызды мәселелерді зерделеп, халықтың мұң-мұқтажын айтады. Ал, «ДАТ – дәйекті айшықты тақырып» тележобасы барысында облыстың саяси-экономикалық, қоғамдық-әлеуметтік, мәдени-рухани өміріндегі маңызды оқиғаларға сараптама жасап, ұлттық құндылықтарымызға қатысты таңдаулы тақырыптарды талқылап және оны шешудің оңтайлы жолдары туралы ой тастайды.

Дана Нұржігіттің «Дара жолы» іспеттес «Ғибрат» бағдарламасы аймақтың мәдениеті мен өнеріне, ағарту саласына, экономикасының өсуін атсалысқан тұлғалардың өнегелі өмірін насихаттайды.

«ARQA LIVE» тікелей эфирі қоғамдағы түрлі әлеуметтік топтардың өзекті де өткір мәселелерін ортаға салады. Оны атқарушы билік пен облыс тұрғындары арасындағы алтын көпір деуге де болады. Бұл көрерменге көгілдір экрандағы тікелей жүздесу арқылы өздерін толғандыратын сауалдарға бірден жауап алып, ұсыныс-тілектерін білдіруге берілетін бірден-бір мүмкіндік.

«5 канал» телеарнасындағы «Мәдени мұра» бағдарламасын да айта кеткен жөн. Олар өңіріміздегі мәдени ескерткіштерді, туындыларды дәріптеу арқылы ұлттық құндылықтарымызды нығайтуға күш салуда.

Қорыта айтсақ, өңірлік арнадағы бағдарламалар ұлт мүддесі мен халық игілігі үшін жұмыс жасауда.

Көрермен не күтеді?

Бүгінгі таңда көк жәшік алдындағы көрермендердің көбі – зейнет жасындағылар. «Пікірлеріңіз қандай?», «Қандай бағдарламалар көргілеріңіз келеді?» деп сауал қойсам, бірден «Қалаулымды», «Кел келінімді» құрту керек» деп тарпа бас салады. «Сен жаз соны, ел оқысын. Сол бағдарламадағы қыздарда ұят жоқ, ұлдарда намыс жоқ. Мұндай сұмдықты қай атаңнан көрдің?!» деп нығырлап алған соң ғана, пікірлерін білдірді…

– «Ән мен әнші» бағдарламасын сағындым. Кешкілік ән тыңдап, бір дем алып қалатынбыз. Ал, қазір әннің бәрі той үшін жазылғандықтан, бірыңғай «опмай-опмай». Біле білсек, әннің де тәрбиелік мәні бар. «Ақжүніс» атты әйел тағдыры жайлы бағдарлама болатын. Онда әртүрлі отбасылық жағдайлар шешімін табатын. «Қымызхана» да әзіл-қалжыңы жарасқан бағдарлама еді. Сүйсініп көретінбіз. Ал, енді Елбасы биылғы жылды Жастар жылы деп жариялауына байланысты жас буынға тәлім-тәрбие беретін, жас келіндерге үлгі-өнеге болатын бағдарламалар мен қазақтың ұмытылып бара жатқан салт-дәстүрлері жайлы дүниелер көрсетілсе деген тілек бар. Сонымен қатар, мақал-мәтелдер мен жаңылтпаштардан сайыстар көрсетілсе, – дейді Қарлығаш апай.

– Журналист Қасым Аманжолұлы жүргізген «Шынның жүзі» хабары көрерменнің жібермей қарайтын бағдарламаларының бірі болатын. Бұл хабар да жабылды. Тарихқа айналды. Сондай-ақ, Ақселеу Сейдімбек пен Жәнібек Кәрменовтің сыр-сұхбаттық әдебисазды бағдарламасы көзіқарақты жұрттың әлі де көкейінде. Іздейміз. Халық арасында «Жәнібек ән салады, Ақселеу тамсанады…» деген қанатты тіркес қалдырған бағдарламаның бүгінде мәні артып тұр. Осындай дүниелерді қайта жаңғыртса, кәні, – дейді ауыл ақсақалы Өмірбек ата.

Түйін

Біз айтты екен деп түзеле салатын эфир бар ма? Дегенмен, телеэкранды тәрбие құралы ретінде ұтымды пайдалансақ деген ой – көңіл төрінде. Әжем «Қазақстан» арнасындағы 2000 жылдардағы «Ұят болмасын» ойын-сауық отауы бағдарламасын сағынып жүргенін айтып қалды бір сөзінде. Ұят болып жүрмесін… Айтпақшы, ұят болған әлдеқашан… Үзіліс арасындағы жарнама ұяттан жерге кіргізеді… Жазуға қысылып отырғаным-ай…

Қасымхан ҒАЛЫМ

Сообщение Эфирді түзеу – елдік мұрат появились сначала на «ORTALYQ QAZAQSTAN» газеті.

    Жалпы, өңірлік БАҚ-тарды бәсе­келестік ортаға беру (жекешелендіру) туралы үкіметтік жобаның құлағы қылтиғалы 2-3 жылдың жүзі болған. Әсіресе, өткен жылдың соңында мемлекеттік-ақпараттық саясатты оңтайландыру деген желеумен барлық облыстық газеттерді үл­кен газеттің біріне филиал жасап, орталықтандырылған жүйеде бас­қару жобасы да сөз болғаны жасырын емес. Оның алдында, нақтырақ айтсақ, 2015 жылдың 30 желтоқсанындағы ҚР Үкіметінің «2016-2020 жылдарға арналған жеке­шелендіру мәселелері туралы» №1141 Қаулысына сәйкес 30 өңірлік БАҚ бәсекелестік ортаға берілетіндер тізіміне енген. Жекешелендіру кес­тесі де жасалған. Ол тізімде біздің «Орталық» та, кеше ғана сатылып кеткен «Дидар» да бар еді.

    Жергілікті атқарушы билік пен БАҚ басшыларының бұл мәселеге қатысты назына назар аударған Үкімет басшысы Б.Сағынтаев ҚР Президентіне хат (шығ. №21-35/И-544, 2016 жылғы 24 қараша) жазып, елдегі ақпараттық қауіпсіздікті нығайту мақсатында өңірлік БАҚ-тарды әлгі тізімнен алып тастау туралы ұсыныс енгізген. Ұсынысты Елбасы Нұрсұлтан Назарбаев мақұлдайды. Бөркімізді аспанға атып қуанғанбыз. Біздікін қайдам, «Дидардың» қуанышы ұзаққа бармады. Премьер-Министрдің пәрмені мен Елбасының мақұлдауын, 2015 жылғы 30 желтоқсандағы Қаулыға өзгеріс енгізу бағытындағы қаншама министрліктердің (Ұлттық экономика, Ақпарат және коммуникациялар, Әділет, Қаржы министрліктері) ше­шімдеріне пысқырып та қарамаған Жезқазған қаласының әкімі Батырлан Ахметов жалғыз телеарнасын сатты да жіберді. Өзгеріс енген 2015 жылғы 30 желтоқсандағы Қаулыны негізге алған екен. Сондай-ақ, «ҚР Мемлекеттік мүлік туралы» Заңының жекешелендіруге қатысты талаптарын өрескел бұзып отыр. Мәселен, «Дидар» телеарнасын бәсекелестік ортаға беру жөніндегі алғашқы сауда 2016 жылдың 8 қарашасында өткен. Екінші сауда 2016 жылғы 7 желтоқсанда өткізіледі. Заңның 101 бабының 4-1 тармағына сәйкес, әр сауда арасына 20 жұмыс күнін салып өткізілуі тиіс болатын. Олай болса, үшінші сауда 2017 жылдың 10 қаңтарында өтуі керек еді. Ал, «Дидар» 2016 жылдың 30 желтоқсанында сатылып кете барған. Тура осы «ҚР Мемлекеттік мүлік туралы» Заңның 101 бабындағы 8 тармақ талабы бойынша сауда барысында заң бұзу­шылыққа жол берілген жағдайда сауда өткізілген жоқ деп танылуы шарт.

    Оны құзырлы органдар анықтай жатар. Бізге белгілісі – «Дидар» телеарнасы заңсыз сатылып отыр. Кішкентай қаладағы үлкен кісілердің мүддесі жатыр мұның астарында. Қала әкімі Батырлан Ахметов қала бюджетіне салмақ салмай, өз күнін өзі көріп келе жатқан тарихы бай телеарнадан құтылуға неге асықты екен? Түсіну қиын. Мәселенің мәнісі мынада жатыр ма деп қаласың. Батырлан мырза әкім болып келгелі мемлекеттік тапсырыс орындап отырған екі газет пен бір телеарнаны «шөміштен қысып» келген. Мәселен, «Дидар» телеарнасына 2015 жылы мемлекеттік тапсырыс есебінен қаралған қаржы көлемі 15 млн. болса, 2016 жылы 17,5 млн. болыпты. Ал, 2017 жылға жалпы қала аумағында мемлекеттік саясатты ақпараттық насихаттауға болжанған қаржы 62 млн. (2016 жылға – 39 млн. ғана болған) теңге. Екі газетке осы қомақты қаржының 40 млн. теңгесі (20 млн. теңгеден берілгенде делік, бұл газеттер ғұмырында мұндай қаржыға қол жеткізіп көрген емес) бағытталды дегеннің өзінде, «сенімді қолға» өткелі тұрған «Дидар» телеарнасына 22 млн. теңге бұйырмақ. Не деген жомарттық?! Сот шешімімен «Дидардың» сатылуы заңсыз деп танылса, бюджетті нақтылау кезінде бұл сома қысқара салуы кәдік. Оған таң қалмаңыз.

    Қалай болғанда да, Елбасының тапсырмасы орындалмай, Үкімет шешімі назарға алынбаған жерден мемлекетшілдік рух іздеуіміз де бекер секілді. Бұл келеңсіздікке бірдеңе қылып тоқтау салмаса, бір күні Жезқазғанның өзін жекешелендіріп алуы мүмкін ғой. Негізі, Елбасы мен Премьер-Министрдің тапсырмасына жүрдім-бардым қарап, ойына келгенін істеп отырған Батырлан Ахметов шынымен-ақ «батыр» екен…

Ерсін МҰСАБЕК

ЖЕЗҚАЗҒАН қаласы.

Сообщение Елбасы тапсырмасы еленбей тұр появились сначала на «ORTALYQ QAZAQSTAN» газеті.

«Ел болам десең, бесігіңді түзе» деген ата-бабамыз ертеңгі күннің иелері жас ұрпақтан зор үміт күтіп, ертеден-ақ баласының бабын жасауға барын салған. Келешек иелеріне деген қамқорлық қазіргі таңда да қажетті деңгейде жасалуда. Бұл үшін елімізде жарқын бастамалар мен бағдарлы бағдарламалар жүзеге асырылып жатыр. Солардың бірі – «Балапанның» бастамасымен жер-жерлерде көптеген балабақшалар бой көтеріп, балғын балақайлар күлкісімен көмкерілуде. «Балапан» – бақытты балалықтың бағдарламасы.

Оның негізгі мақсаты – халықтың мектепке дейінгі тәрбие мен оқыту ұйымдарының сапалы көрсетілетін қызметтеріне қажеттілігін қанағаттандыру. Ал, міндеттері – 2015 жылға дейін мектеп жасына дейінгі балалардың 77%-ын, 2020 жылға дейін – 100% қамтылуын қамтамасыз ету, мектепке дейінгі ұйымдарға деген тапшылық проблемасын шешу үшін қажетті қаржылық-экономикалық жағдай жасау. Мектепке дейінгі ұйымдарды білікті кадрлармен толық қамтамасыз етуді және олардың біліктілігін тұрақты түрде арттыруды жүзеге асыру, инклюзивті білім беруді дамыту. Сондай-ақ, оқытудың жаңа әдістемелері мен технологияларын енгізу есебімен тәрбиелеу мен оқыту мазмұнын жаңарту.

Бағдарлама елдегі мектепке дейінгі ұйымдардың тапшылығы деңгейін төмендету жөніндегі түбегейлі шаралар қабылдауды, мектепке дейінгі білім беру қызметінің сапасын арттыруды қамтамасыз етеді.

Қаламызда «Балапан» бағдарламасының орындалуы мақсатында бірқатар жұмыстар атқарылды.

«Балапан» бағдарламасының аясында 2010 жылы №2 жалпы орта білім беретін мектепте 50 орынға «Күншуақ» шағын орталығы, 2011 жылы 200 орынға «Еркетай» шағын орталығы, 2015 жылы 200 орынға «Балақай» бөбекжайы ашылды.

Мектепке дейінгі ұйымдарда оқыту Елбасымыздың көптілдік саясатын қолдану мақсатында қазақ, орыс, ағылшын тілдерінде жүзеге асады.

«Айналайын» бөбекжайында мектепке дейінгі білімді көтеру мақсатында дәстүрлі әдістемемен қатар, М.Монтессори әдістемесін қолдануды жетік меңгерген. Осының дәлелі, 2015 жылы «Айналайын» бөбекжайы инклюзивті білім беру бойынша облыстық семинар өткізіп, Қарағанды облысының оқу-әдістемелік орталығы, білім басқармасының өкілдері мен директорлары, әдіскерлерімен қатар, облыстың барлық аймақтарынан 56 адам қатысты.

Қаламыздың басқа да бөбекжайлары Қарағанды облысының оқу әдістеме орталығының бастамасымен өтетін барлық іс-шараларға белсене қатысады. Бұл ретте «Балбөбек» бөбекжайы «Отбасылық мектеп» атты облыстық жобаға қатысқанын ерекше атап өткен жөн.

2016 жылы республикалық «Үркер» марафонына, «Пони» интеллектуалды ойындарына ересек топтардың тәрбиеленушілері қатысып, сертификаттар мен дипломдар алды. Бөбекжай педагог қызметкерлері Қазақстан Республикасы Білім және ғылым министрлігімен бекітілген «Алғашқы қадам», «Зерек бала», «Біз мектепке барамыз» бағдарламаларымен және мектепке дейінгі тәрбие мен оқытудың мемлекеттік жалпыға міндетті стандарты бойынша жұмыс жүргізеді. Бөбекжайларда «Денсаулық сақтау», «Ақпараттық», «Ойын» және «Монтессори» технология элементтерін қолданады. «Do not have. Letter K», «Біз – балдырған баламыз», «Ана – аса қымбат жан», «Жыл басы – Наурыз» «Жол тәртібін білейік!», «Мен ғарышкер боламын», «Бауырласпыз, дос-туыспыз, біргеміз», «Ұлы Жеңіс жасасын!», «Мектепке барам мен енді», «Бақытты балалық шақ» атты тақырыптарда өткізілген іс-шаралар ата-аналардың да көңілінен шығуда.

Қазіргі заманда білімді ұстаз болу үшін біліктілікті арттыру ең маңызды міндет болып табылады. Білім бөлімі мектепке дейінгі ұйымдардың педагогтарының кәсіби біліктілік деңгейлерін арттыру мақсатында Қарағанды қаласына біліктілік көтеру курстарына қатысып, білімдерін жетілдіруде.

«Балапан» бағдарламасының орындалуы кішкентай бүлдіршіндеріміздің болашағы жарқын болуына өз үлесін тигізетіні сөзсіз.

Саягүл АХМЕТОВА,

қалалық білім бөлімі басшысының міндетін атқарушы.

ПРИОЗЕРСК қаласы.

Сообщение Бақытты балалықтың бағдарламасы появились сначала на «ORTALYQ QAZAQSTAN» газеті.