Табыстың тайқазанын қайнатқандар
Мемлекет басшысы Қасым-Жомарт Тоқаев Қарағанды облысына сапармен келгенде «Бірлік, ынтымақ, толеранттылық, өзара құрмет, жанашырлық және әрқашан бір-бірімізге қол ұшын беруге дайын болу біздің дәстүріміз бен мәдениетіміздің негізінде жатыр. Біздің ұлттық болмысымызды қалыптастыратын бұл бірегей құндылықтарды жасанды идеологиялық құрылымдарға телу оңай емес. Бірақ, менің ойымша, бұған қажеттілік жоқ» деген болатын.
Қарағанды – өндірістің ошағы. Кәсіпорындарға мемлекет тарапынан көрсетіліп отырған қолдау қомақты әрі өңір өзге ұлт өкілдерін жұмыспен қамтуға сүбелі үлес қосуда.
Көші-қон қызметі органдарының мәліметінен байқағанымыз, өңдеу нәтижелері бойынша 2022 жылғы қаңтар-желтоқсан аралығында облысқа 10 695 адам келіп, облыстан 16 144 адам шығып кеткен. 2021 жылға қарағанда облысқа келгендер саны 23,9%-ға, облыстан шыққандар саны 1%-ға өсті.
Әсіресе облысқа келгендердің басым көпшілігі өндіріске жұмысқа орналасқан. Бүгінде аймақта қазақтардан басқа орыстар (43,6%), украиндар (5%), беларусьтер (4.0%), немістер (0.2%) және басқалары (7.5%) тұрады. Осы орайда көмірлі шаһар елімізге этносаралық және дінаралық толеранттылықтың жарқын үлгісі ретінде танымал екенін аңғарған жөн.
Ұлттық статистика департаменті ұсынған мәліметке сүйенсек, 2023 жылы көші-қон нәтижесінде 21 078 адам облыс ішіндегі тұрғылықты жерін өзгерткен. Бұл өткен жылдың қаңтар-желтоқсанымен салыстырғанда 3,9% – ға аз. Ал, 2022 жылғы қаңтар-желтоқсанда облыс өңірлерімен алмасу кезінде көші-қонның оң көрсеткіші тек облыс орталығында (3343 адам) байқалған. Теміртау (101) және Саран қаласындағы (72) көрсеткіштер ерекше көзге түсті. Әсіресе, үлкен көші-қон шығындары Шет (757 адам) және Қарқаралы (721) аудандарында байқалды. Көші-қонның оң көрсеткіші Теміртау, Саран қалаларында байқалғаны әрине өндіріс ошақтарында жұмыс істейтін өзге ұлт өкілдерімен байланысты.
Мемлекет басшысы Қасым-Жомарт Тоқаев Жолдауында Саранда өндіріс орындарының іске қосылып, соның арқасында елдімекеннің моноқалалар санатынан шығарылғанына тоқталып, осы тәжірибені қолдану қажеттігін үлгі еткен еді.
Бүгінде Саран индустриялық аймағында шоғырланған «QazTehna» ЖШС – Саранға серпін беріп отырған кәсіпорынның бірі. Онда жұмыс істегені 2 жылға жуықтаған өзге ұлт өкілі – Александр Петрович Алматыдан келген.
– «QazTehna» бренді қалыптасып, қанаты қатайған кәсіпорын. Төрт жылдың ішінде тек Қарағанды автопаркін ғана жаңартқан жоқ. Елорда, Шымкент, Алматы және еліміздің басқа да қалаларына автобус құрастырып беріп отыр. Күніне төрт-бес автобус жолға шығады. Заманауи жабдығы толық зауыттың жыл сайын өндірістік қуаты сәйкесінше өседі.
Мұндағы жеті жүзден асатын жұмысшылардың 70%-ы Саран қаласының жергілікті тұрғындары. Қалғаны өзге ұлт өкілдері. Солардың қатарында біз де жүрміз, – дейді Александр Петрович.
Сол сияқты жоғарыда аталып өткен Шет ауданында катодты мыс өндіретін зауыт бар. Жылына 9 мың тонна түсті металл экспорттайтын кен қорындағы қосымша геологиялық-барлау жұмыстарына өзге ұлт өкілдері де тартылған.
Аяулым СОВЕТ,
«Ortalyq Qazaqstan»
