Қарағанды техникалық университетінде «Сергектік пен денсаулық – 2026» спартакиадасы өтіп жатыр
Әбілқас Сағынов атындағы Қарағанды техникалық университетінде профессор-оқытушылар құрамы арасында ұйымдастырылатын дәстүрлі «Сергектік пен денсаулық – 2026» спартакиадасы өтіп жатыр. Университет ұжымының салауатты өмір салтын ұстануына серпін беретін спорттық іс-шара жыл сайын дәстүрлі түрде ұйымдастырылады.
Білім ордасының әлеуметтік-тәрбие ісі жөніндегі проректоры Абай Қалықов жыл сайын өтетін спартакиаданы ұстаздар асыға күтетінін айтты.
– Аталған спартакиаданың басты мақсаты – профессор-оқытушылар құрамының денсаулығын нығайтып қана қоймай, күнделікті қарбалас қызмет барысында дене шынықтыру мен спортты тұрақты серік етуге үндеу. Сонымен қатар, іс-шара ұжым мүшелерін бір арнаға тоғыстырып, командалық рухты қалыптастыруға, әр факультет арасындағы серіктестік пен достық қарым-қатынасты арттыруға ерекше ықпал етуді көздейді. Университет басшылығының қолдауымен ұйымдастырылған жарыстарға барлық құрылымдық бөлімшелерден командалар қатысып, спорт алаңдарында өзара бақ сынады, – деді Абай Қалықов.
Биылғы спартакиада бағдарламасы дәстүрлі және зияткерлік спорт түрлерін қамтыды. Атап айтқанда, футзал, волейбол, үстел теннисі, шахмат, арқан тарту, сондай-ақ, ұлттық зияткерлік ойын саналатын тоғызқұмалақ бойынша өтуде. Мұндай әралуандық қатысушылардың жас ерекшелігі мен спорттық дайындығына қарамастан, әрқайсысына өз мүмкіндігін көрсетуге жол ашып отырғандығын айтады ұйымдастырушылар.
Спорттық іс-шара барысында тек жарыс қана емес, ұжымдық бірлікті арттыратын түрлі кездесулер мен бейресми форматтағы достық сайыстар да ұйымдастырылуда.
Жарыс қорытындысы бойынша, футзалдан «Дене тәрбиесі» кафедрасы, 1-ші корпус командасы, бас корпус командалары жеңімпаздар қатарынан көрінсе, шахматтан 1-ші корпус командасы, тау-кен факультеті мен «Дене тәрбиесі» кафедрасы жүлдегер атанды.
Волейбол, үстел теннисі, арқан тарту және тоғызқұмалақ бойынша жарыстар қаңтар айы бойы жалғасады.
Ерік НАРЫН,
«Ortalyq Qazaqstan»
