Статистика саласының 105 жылдығы аталып өтті
1920 жылдың 8 қарашасында Қазақ АКСР-інің статистика қызметі құрылып, ұлттық статистиканың іргетасы қаланған болатын. Содан бері статистика саласы елдің даму жылнамасымен біте қайнасып, экономикалық өсім мен әлеуметтік өзгерістердің айқын айнасына айналды. Осы бір мерекеге орай Қарағандыдағы “Amanat” партиясының облыстық филиалында салтанатты іс-шара өтті. Оған облыс әкімі Ермағанбет Бөлекпаев қатысып, бірқатар сала мамандарына марапат тапсырды.
Өңір басшысы сала мамандарын құттықтап, жылы лебізін білдірді.
– Қазіргі заманды статистикалық ақпаратсыз елестету мүмкін емес. Себебі дәл осы статистика — жүздеген, тіпті мыңдаған көрсеткіштерді біріктіріп, өңірдің экономикалық жағдайы, халықтың өмір сүру деңгейі мен жұмыспен қамтылуы, демографиялық ахуалы және басқа да маңызды салалар туралы объективті дерек ұсынатын бірегей құрал.
Бүгінде мемлекеттік статистика жаңа сапалық деңгейге көтерілді. Соңғы жылдары заңнамалық база жаңартылып, статистикалық өндіріс толық цифрландырылып, заманауи талаптарға сай модернизацияланды. Қазіргі ақпараттық технологияларды қолданудың арқасында статистика бұрынғыдан да ашық, түсінікті, жедел және пайдаланушыға ыңғайлы бола түсті – ол енді ақпаратты «осы жерде және дәл қазір» ұсынатын сенімді дерек көзіне айналды, – деді Ермағанбет Қабдуллаұлы.
Сонымен қатар, облыс әкімі бірқатар сала мамардарын марапаттады. Солардың қатарында ауыл шаруашылығы статистикасы басқармасының басшысы, статистика департаментінің өкілі Лариса Эм «Ерен еңбегі үшін» медалімен марапатталды. Одан бөлек, осы салаға еңбегі сіңген басқа да жандарға «Статистика үздігі» төсбелгісі табысталды.
Мақаланың толық нұсқасын газеттің алдағы санынан оқи аласыздар.
Ербол ЕРБОЛАТ,
Ortalyq.kz
