СПИД-ке қарсы шок-сабақ өткізілді

Ғабиден Мұстафин кентінің көпшілік кітапханасында “СПИД – ғасыр дерті” тақырыбында шок-сабақ өткізіліп, оған осындағы Бұқар жырау агротехникалық колледжінің студенттері қатысты.

  Студенттер алдында  медицина қызметкері Зарина Жанатқызы сөйлеп, осы ғасыр дертінің пайда болуы, оны жұқтыру механизмі мен аурудың алдын алу жолдары жайлы айтты. Ол осыған байланысты мысалдар келтіріп, аурудың психологиялық және әлеуметтік салдарларын сөз етіп, жастардың індетпен күрестегі ролін атап өтті.

   Шок-сабақ барысында осынау ғасыр дерті туралы бейнеүзінділер көрсетіліп, олар студенттер арасында үлкен әсер қалдырды. Олардың көпшілігі бұл мәселенің қауіптілігі мен маңыздылығын алғаш рет терең түсінгендерін мойындады.

    Бұл сабақ ақпараттық сипатта ғана емес, сонымен қатар жеке жауапкершілікті сезінуге түрткі болып, соңында барлық қатысушыларға жадынамалар таратылды.

Ержан ИМАШ,

Бұқар жырау ауданы