Үштөбеде Мәдениет үйі ашылды
Конституция күні қарсаңында Бұқар жырау ауданының Үштөбе аулында жаңа Мәдениет үйі ашылды. Осыдан отыз жыл бұрын клубы өртеніп кеткен ауылдың 5 мыңнан астам халқы үшін бұл үлкен қуаныш болды.
– Жобалық-сметалық құны 613,1 миллион теңгелік осы ғимаратқа “Бұқар жырау аудандық құрылыс бөлімі” тапсырыс беріп, оның құрылысын 2022 жылдың қазан айынан бастап бас мердігер “Астана-Көктем С” ЖШС мен қосалқы мердігері “Qurlys Astana 2019” ЖШС жүргізіп, бүгін пайдалануға беріп отыр, – дейді Үштөбе ауылдық округінің әкімі Әлем Көпбаева. – Қазірде оның сырты қоршалып, төңірегі асфальтталып, 200 орындық көрермендер залы мен үйірмелерге арналған 4 бөлмесі бар оған қажетті барлық жабдықтар мен жиһаздар сатып алынды.
Үштөбедегі заманауи,сәулетті Мәдениет үйін облыс әкімі Ермағанбет Қабдулаұлы Бөлекпаев салтанатты түрде ашып, оны аралап көріп, жаңа мәдени нысанның байғазысына 10 домбыра мен бір баян аспаптарын сатып алу үшін ақша сертификатын берді.
Одан әрі жиналған жұрт жергілікті суретші Берік Қарашолақовтің сурет көрмесімен танысып, акт залында жалғасқан салтанатта сөйлеген сөзінде Бұқар жырау ауданының әкімі Ерлан Құсайынов “Ауыл – ел бесігі” жобасы бойынша өңірде атқарылып жатқан игі істерге тоқтала келіп:
– “Гүлденсе ауыл, гүлденеміз бәріміз” дегендей, ауылдарымыздың дамып, өркендесе, мемлекетіміз де нық тұрады. Біз бүгін Конституция күні мен сіздердің ауылда жаңа Мәдениет үйінің ашылуын қатар тойлаудамыз. Енді осы жерден елімізді әлемге танытар өнер дарындары түлеп ұшсын, – деді.
Бұдан кейін сахнаға көтерілген Бұқар жырау аудандық мәслихатының төрағасы Асхат Әли, ауыл ақсақалы Қожан Тәжібаев, білім және мәдениет ардагерлері Күліш Төлеуханқызы, Мүгілсім Шибаева мен Светлана Браун, облыстық мәслихаттың депутаттары ,айтыскер ақын Айтбай Жұмағұлов пен Меруеш Башай құттықтау тілектерінің легін ағытып, Күліш Төлеуханқызы мереке құрметіне “Қыз Жібек” операсынан Төлегеннің анасы Қамқаның ариясын аңыратты. Ал жергілікті жомарт азамат Самат Бейсенбайұлы Мәдениет үйінің көрімдігіне өзінің курстас досы, Мәшһүр Жүсіптің шөбересі Абай Шарапиевтің “Тылсым әлем” кітабы мен Ұлы Абай бейнеленген гобеленді ұсынып, сондай кітап пен Мәшһүр Жүсіптің суреті бар гобеленді оның әдеби мұрасын насихаттап жүрген Ермек Тұрсынқызына тарту етті.
Келесі кезекте зал толы халық аудан мен үштөбелік өнерпаздардың концертін тамашалады. Оны Арқаның ақтангер айтыс ақыны Тілеген Әділов арнауымен ашып, әріптес ақынымыз Ерік Нарынов өзінің “Иіс” өлеңін оқып, “Қарқаралы” тобы қазақтың халық әні “Әттең-айды” әуелетті. “Маэстро” және “Замандастар”, “Айнах” топтары, “”Супер ботақан” балабақшасының бүлдіршіндері, Дәлеткелді Сағатов, Сәкен Омаров, Қазбек Талашев, Әділ Мәгпаров, Бақытжан Рахымжанов, тағы басқа да өнер иелері орындаған әндер мен билер көрермендерді сүйсінтіп, ықыласына бөленді.
Ержан ИМАШ,
Бұқар жырау ауданы
