Шет ауданының дене шынықтыру мұғалімі республикалық байқауда топ жарды

Шет ауданы, Ақсу-Аюлы ауылындағы Жамбыл Ақылбаев атындағы мектеп-гимназияның дене шынықтыру пәні мұғалімі Мирас Құлсарин республикалық деңгейде үздіктер қатарынан көрініп, «Үздік дене шынықтыру педагогі – 2025» байқауында топ жарды. Бұл – үлкен еңбек пен табандылықтың және кәсіби шеберліктің нәтижесі.

Аудандық, облыстық кезеңнің жеңімпазы атанған Мирас Есембайұлының мектеп тарихында екінші рет республикаға жолдама алып, «Үздік дене шынықтыру педагогі – 2025» байқауында сертификат иегері атанды. Мұндай нәтиже мұғалімнің кәсіби шеберлігін, үздіксіз ізденісі және қажырлы еңбегін айқындайды.

Мирас Есембайұлы – өз ісіне адал, оқушы денсаулығы мен спорттық мәдениетін арттыруға ерекше үлес қосып келе жатқан білікті педагог. Оның сабағы жаңашыл жаттығу әдістерін, заманауи спорттық технологияларды пайдаланып өткізуімен ерекшеленеді.

Республикалық кезеңнің алғашқы турында креативті педагог ретінде ол инновациялық жаттығу бағдарламаларын таныстырып, оқушыға күш-жігер берудің авторлық әдістерін көрсетті. Сонымен қоса, дене шынықтыру сабағын тәрбие, тәртіп және ерік-жігер қалыптастыратын мектеп ретінде ашып көрсетті. Оқушылардың нақты жетістіктерін дәлел ретінде ұсынып, кәсіби миссиясын бейне және фотопрезентация арқылы айқын жеткізді.

Осылайша Мирас Есембайұлы бірінші турды жоғары деңгейде қорғап, қазылар алқасынан лайықты баға алды.

Мирас Есембайұлына жаңа жетістіктер мен толайым табыстар тілейміз! Кеңес одағының батыры Бауыржан Момышұлы айтқандай, «ұстаздық еңбек қашанда – нағыз ұлы қызмет» болып қала бермек.

Д.ТӘЖІБЕКОВ,
Б.БОЛЫСПЕКОВ
Жамбыл Ақылбаев атындағы мектеп-гимназияның
дене шынықтыру пәнінің мұғалімдері
Шет ауданы