Қарағанды – қара алтынның отаны. Сол себепті, өңірімізде тау-кен саласында еңбек етіп келе жатқан бүтін бір әулет көп. Аймағына адал еңбегімен даңқы жеткен Абсатовтар әулеті – солардың бірі. Шахтинск қаласындағы бұл шаңырақтың жалпы еңбек өтілі 300 жылға жуықтайды.
Шахтинск қаласының іргесіндегі «Qarmet» компаниясына қарасты «Қазақстан» шахтасы Абсатовтар әулетінің екінші шаңырағындай. Мұнда тек әулеттің ер-азаматтары ғана емес, нәзікжандары да еңбек етеді.
Сонымен, әулеттің шахтадағы дәуірі, даңқты кенші Сембі Абсатовтың «Долинская» шахтасына жұмысқа орналасуымен басталады. Одан соң Сембі өзінің бауырларын да қасына жұмысқа тартады. Тоқсаныншы жылдардың жетпісінші жотасында еңбек жолын осылай бастаған кеншілер әулетінің үшінші буыны да абыройлы мамандықты мирас етіп, аталарының дәстүрлі жолын жарасымды жалғап келеді.
«Отбасымызда сегіз ағайындымыз. Әкеміз Абсат өмірден ерте өтті. Анамыз бізді жалғыз өзі өсіріп-тәрбиеледі. Шахтаға ең бірінші болып, ағаларымыз Сембі, одан кейін Сембек пен Кеңес жұмысқа орналасады. Міне, осы уақыттан бастап, кеншілер әулетінің дәуірі басталды десек те болады. Кеңес Абсатов ағамыз «Қазақстан» кенішінде рельсті тасымалдау бөлімінің электровоз машинисі болып 53 жылдан астам еңбек етті. Ағам Сембі Абсатов шахтаның рельсті тасымалдау бөлімінің жер асты оқпаншысы болып, 48 жылдан астам уақыт бойы шахтада жұмыс істеді. Менің де, еңбек өтілім 40 жылға жуықтады. Бұл біздің отбасылық мамандық десе де, болады. Әйелім Сәуле де, бауырларым мен келіндерім де осы кеніште еңбек етеді», – дейді майталман кенші Марал Жампейісов.
Бүгінгі күні құрметті кенші Марал Жампейісов «Қазақстан» кенішінің кәсіподақ комитетінің төрағасы. Ал, аяулы жары Сәуле Жампейісова кеніштің автоматика және байланыс бөлімінде жұмыс істейді. Абсатовтар әулетінің үшінші буыны Талғат Абсатов, Жанат Абсатов, Мұрат Абсатов, төртінші буын Жанат Абсатовтың ұлы Әлібек Абаев пен келіндері Ғайни Абсатова, Рымбала Абсатова, Гүлназия Жампейісова да осы кеніште еңбек етіп, көмір өндірісінің өркендеуіне өздерінің үлесін қосып жүр.
Марал Жампейісовтің кеудесінде орден, медаль жарқырап тұр. I, II, III дәрежелі «Кенші даңқы» орденінің иегері. «Көмір өнеркәсібінің құрметті қызметкері» атағы бар. Және «Еңбек ардагері» медалімен марапатталған.
Кеңес Абсатов пен жары Рымбала Абсатова – «Қазақстан» шахтасына еңбегі сіңген ерлі-зайыпты. Екеуі де табан аудармай, отыз жылдан аса бір кеніште жұмыс істеген.
– Әкем 1976 жылдың ақпанында шахтаға қатардағы жұмысшы болып кірді. Кейін электровоз машинисін оқып, 2007 жылға дейін осы қызметін абыроймен атқарды. Кейін денсаулығына байланысты зейнетке шықты. Кеншінің қауіпті мамандық екенін білеміз ғой. Денсаулықты алады. Сол себепті, әкемізді зейнетке шығарып алдық. Аз уақыт істемеді. Өзінің жұмысын жауапты атқарды. Әріптестерінің арасында құрметті. Ал, анамыз Рымбала Абсатова 1979 жылы шахтаға заңгер болып орналасып, 2008 жылға дейін еңбек етті. Екеуінің еңбек өтілі қосқанда 60 жылға жуықтайды. Әкемнің көп жылғы еңбегі ескерусіз емес. II және III дәрежелі «Еңбек даңқы» орденінің иегері. Үнемі кеудемізді мақтаныш кернеп жүреді. Кеншілер күні біздің отбасымыз үшін ғана емес, әулетіміз үшін қастерлі мереке, – дейді Талғат Кеңесұлы.
Үлкен ұлдары Талғат та әке жолын жалғады. Ол 1998 жылдың тамызында шахтаға тау-кен шебері болып жұмысқа орналасқан. Содан бері Шахтинск қаласы іргесіндегі шахтаның белді кеншісі. Қалған үш бауыры Қарағанды мемлекеттік техникалық университетін тәмамдап, өндіріс саласында өз мамандықтарымен еңбек етіп жүр.
Ал, Сембек Абсатов «Қазақстан» кенішінде ең жауапты қызметте, яғни, бұрғылаушы болып еңбек етті. Жары Ғайни лампашы болып жұмыс істеген. Екеуінің жалпы еңбек өтілі шамамен 50 жылға жуықтайды.
Осылайша, кеншілер әулетінде мәртебелі мамандық әкеден балаға мирас болып келеді. Ағалары Сембінің де балалары тау-кен саласында. Абай Абсатовтың ұлдары аталарының ізін лайықты жалғап жүр.
– Жанат бұл шахтада 2003 жылдан бері бұрғылаушы. Ал, Мұрат 2000 жылдан бастап, тау-кен қазу машинисі. Жанаттың ұлы Әлішер де осыдан екі жыл бұрын шахтаға жұмысқа орналасты. Ол кенші ғана емес, джиу-джитсудан Қазақстан чемпионы, қол күрестен спорт шебері, – дейді әулеттің үлкені Марал Жампейісов.
Абсатовтар әулеті үшін кеншілер мерекесінің жөні бөлек. Олар мерейлі сәт күні қарашаңырақта бас қосып, дастархан жайып, бір-бірін құттықтап, құрмет көрсетеді. Осылайша, бүтін бір шаңырақтың «Қазақстан» шахтасына да, Қазақстан еліне де еңбекпен сіңірген үлесі бар.
Маңдай тер, дәріптеліп келе жатқан дәстүр, атадан балаға мұра болған мәртебелі мамандық, дәулетті әулет, береке мен бірлік, қысқасы шаттықты шаңырақтың өнегесі өміршеңдігін, әрине, ерлікпен пара-пар еңбектен аңғарамыз…
Қасымхан БҮРКІТҰЛЫ,
«Ortalyq Qazaqstan»
Шахтинск
