Шаңырақ күніндегі шаттық
Көктеммен бірге келетін жаңару мен үміттің нышаны – Наурыз мейрамы аясындағы «Шаңырақ күні» аймақта ерекше сипатта өтті. Бұл күні өмір есігін ашқан сәбилерге ақ тілектер айтылып, жас аналарға құрмет көрсетілді.
Қазақстан халқы Ассамблеясының мүшелері мен ҚХА жанындағы Аналар кеңесінің өкілдері қаладағы перзентханаларды аралап, дәл осы күні дүниеге келген нәрестелердің аналарын құттықтап, арнайы сыйлықтар табыс етті.
Мерекелік іс-шара барысында Қарағанды қаласындағы үш перзентхана қамтылды. Әрбір шаңырақта жаңа өмірге келген сәбилер – елдің ертеңі, отбасының қуанышы ретінде құрметке бөленді.
Алғашқы құттықтау Қарағанды қаласындағы №1 перинаталдық орталықта өтті. Бұл күні ана атанған 29 жастағы Айжан Серікқызына «Шешен-ингуш» этномәдени бірлестігінің төрағасы Увайс Джанаев пен «Вайнах» этномәдени бірлестігі Аналар кеңесінің мүшесі Раиса Хусейнова арнайы барып, ақ тілектерін жеткізді. Олар жас анаға ізгі ниеттерін білдіріп, естелік сыйлықтар табыстады.
Ал, №2 перинаталдық орталықта Диана Шабдан құттықтаулар легін қабылдады. Оған Қарағанды облыстық ҚХА жанындағы Аналар кеңесінің төрағасы Айжан Киясова мен «Қарағанды облыстық поляк қоғамы «Polonia» қоғамдық бірлестігінің төрағасы Виталий Хмелевский арнайы барып, жылы лебіздерін жеткізді.
– «Шаңырақ күні» – отбасы құндылықтарын ұлықтайтын ерекше күн. Біз үшін жаңа өмірдің басталуына куә болып, жас аналарға қолдау білдіру – үлкен жауапкершілік әрі құрмет. Бүгін дүниеге келген әрбір сәби – еліміздің болашағы. Сондықтан, аналарға жылы сөз айтып, қуаныштарын бөлісу – біздің азаматтық парызымыз деп білемін. Осындай шаралар қоғамдағы бірлік пен жанашырлықты нығайта түседі, – дейді Айжан Қиясова.
Сондай-ақ, Аймақтық акушерлік-гинекологиялық орталықта Ұлжан Молдалықызы да назардан тыс қалмады. Мұнда да ҚХА өкілдері жас ананы құттықтап, сый-сияпаттарын ұсынды.
Айта кету керек, бұл игі бастама тек құттықтаумен шектелмейді. Ол – қоғамдағы отбасы құндылықтарын нығайтуды көздейді. Өйткені, қазақ танымында шаңырақ – ұрпақ сабақтастығының, бірлік пен берекенің белгісі.
Мағжан ҚҰДАЙБЕРГЕН,
«Ortalyq Qazaqstan»
