«Сарантеплосервис» ЖШС-і 500 мың теңге айыппұл арқалады

12-24 маусым аралығында Қарағанды облысы бойынша экология департаментінің мамандары «Сарантеплосервис» ЖШС-не қарасты қатты тұрмыстық қалдықтар полигонына жоспардан тыс тексеру жүргізді. Нәтижесінде табиғатты қорғау заңнамасын бұзғаны үшін компанияға 500 мың теңге айыппұл салынды.

Жоспардан тыс тексеруді бастауға тұрғындардың қатты тұрмыстық қалдықтар полигонында өрттің жиілеп кетуіне қатысты талап-арызы себеп болған.

– Тексеру қорытындысы бойынша заң бұзушылықтарды жою туралы ұйғарым шығарылып, ҚР ӘҚБтК-нің 327-1-бабының 1-бөлігі бойынша әкімшілік жаза тағайындалды. Бұл ретте Қарағанды облысы бойынша экология департаменті қатты тұрмыстық қалдықтар полигондарын пайдалану кезінде өрт қауіпсіздігін, табиғатты қорғау заңнамасын қатаң сақтау қажеттігін еске салады, – деп хабарлады Қарағанды облысы бойынша экология департаментінің мамандары.

Ілияс ДҮНГЕНБАЙҰЛЫ.