Сарандық парабиші Ұлыбританиядан қола жүлдемен оралды

«Саран қаласының тұрғыны, парабиші Айгүл Балмағанбетова Ұлыбританияның Стивенейдж қаласында өткен халықаралық лицензиялық турнирде үздік нәтиже көрсетіп, қола медаль иеленді. Байқауға 13 елден келген мықты параспортшылар қатысып, өз шеберліктерін көрсетті» деп хабарлайды Ortalyq.kz облыс әкімдігіне сілтеме жасап.

Айгүл Балмағанбетова – Саран қаласындағы арнайы әлеуметтік қызметтер көрсету орталығының тәрбиеленушісі әрі Қазақстан ұлттық құрамасының мүшесі. Ол Single woman class2 санатында арбада би билеп, вальс, танго, самба, румба және джайв билерінен тұратын жеке бағдарламасын сәтті орындады.
Көрермен мен қазылардың жоғары бағасын алған спортшы жарыс нәтижесінде қола жүлдеге қол жеткізіп, алдағы әлем чемпионатына қатысуға жолдама алды.
Айгүлдің жарысқа дайындығын жеке жаттықтырушылары Күлшім Аталықова мен Марина Саватеева жүргізген.
2013 жылдан бері халықаралық деңгейде ел намысын қорғап жүрген Айгүл Балмағанбетова – тәжірибелі спортшы. ҚР Парабишілер федерациясының мүшесі және Қарағанды облыстық мүгедектер спорты мектебінің спортшысы қараша айының соңында ол Словакияда өтетін келесі халықаралық турнирге қатысуды жоспарлап отыр.

Жамал АКПАРОВА