Саранда «ТЭМПО-Қазақстан» құбыр зауыты ашылады
«Қарағанды облысының өнеркәсіп өзегіне айналған Саран индустриялық аймағында заманауи құбыр шығаратын жаңа зауыт іске қосылады. Жоба импортқа тәуелділікті азайтып, ішкі-сыртқы нарықтағы бәсекеге қабілеттілікті күшейтеді, 500 жаңа жұмыс орны ашылады» деп хабарлайды Қарағанды облысы әкімдігінің баспасөз қызметі.
Саран индустриялық аймағы машина жасау мен өңдеу өнеркәсібінің өсу нүктесіне айналды: бүгінде мұнда әлемдік стандарттарға сай өнім шығаратын бірнеше кәсіпорын жұмыс істейді, мыңдаған жұмыс орны құрылды. Сол жобалардың ішінде Қазақстанда баламасы жоқ «ТЭМПО-Қазақстан» құбыр зауытының құрылысы аяқталуға жақын. Қазір өндірістік алаңда іске қосу-реттеу жұмыстарына дайындық жүріп жатыр.
Кәсіпорынның жобалық қуаты – жылына 300 мың тоннаға дейін. Зауыт диаметрі 57-630 мм аралығындағы электрдәнекерленген және профильді болат құбырларды шығарады. Өнім мұнай-газ, құрылыс индустриясы және ТКШ салаларында қолданылады. Коммуналдық сектор үшін жылу жоғалтуды азайтатын алдын ала оқшауланған құбырлар өндірісі жолға қойылады.
Жобаның Саран индуаймағында орналасуы кездейсоқ емес: дайын өндірістік инфрақұрылым, ыңғайлы логистика және инженерлік желілер мерзімдерді қысқартуға мүмкіндік берді.
– Бізге электр қуаты, газ, теміржол жолдары және дайын алаң берілді. Бұл құрылыс мерзімін бірнеше айға қысқартуға мүмкіндік берді. Сол үшін аймақ басшылығына зор алғыс айтамыз, – деді «ТЭМПО-Казахстан» ЖШС бас директоры Қайрат Бірманов.
Зауыт іске қосылғанға дейін-ақ кадр іріктеу жүріп жатыр: инженерлер, операторлар, логистика және сату мамандары қажет. Үміткерлер түйіндемесін hr@tempo.kz поштасына жолдай алады. Компания Қарағанды облысының Білім басқармасымен меморандум жасасып, студенттерге нақты мамандықтар бойынша оқыту мен өндірістік тәжірибе ұйымдастырады. Түлектерге жұмысқа орналасуда басымдық беріледі.
Жамал АКПАРОВА
