Саланың стратегиясын санақ айқындайды

ҚР Стратегиялық жоспарлау және реформалар агенттігі Ұлттық статистика бюросының басшысы Мақсат Тұрлыбаев жұмыс сапарымен Осакаров ауданында болып, ауыл шаруашылығы санағының ұйымдастырылу және өту барысымен танысты.

Сапар барысында Бюро басшысы мен облыс әкімінің орынбасары Руслан Кенжебеков арнайы жиын өткізіп, санақ жұмыстарының маңыздылығына тоқталды. Жиында агроқұрылымдарды толық қамту, деректердің нақтылығын қамтамасыз ету, сонымен қатар ауыл тұрғындарының белсенділігін арттыру мәселелері қаралды.

Қарағанды облысы – еліміздің ауыл шаруашылығы саласы неғұрлым дамыған өңірлерінің бірі. Аймақта өсімдік шаруашылығы мен мал шаруашылығы қатар дамып келеді. Атап айтқанда, өңірде дәнді, майлы, мал азықтық және техникалық дақылдар өсіріледі. Ал мал шаруашылығында ірі қара, қой-ешкі мен жылқы басым бағыттар ретінде танылған. Биылғы жылдың 1 шілдесіндегі статистикалық мәліметке сүйенсек, облыста 463,9 мың бас ірі қара, 778,6 мың бас қой мен ешкі тіркелген. Сонымен қатар, ауыл шаруашылығына арналған жер көлемі 11,9 миллион гектарды құраса, соның ішінде 1,2 миллион гектар жер – егістік алқаптары.

Өңдеу өнеркәсібінде де агроөнімдерді қайта өңдеу жетекші орынға ие. Нақты айтқанда, өңірде астық өңдеу саласы – 28%, нан-тоқаш өнімдері – 20,1%, ал ет өңдеу саласы – 13,6% үлеске ие.

– Ауыл шаруашылығы санағы – бұл тек статистикалық шара ғана емес, сонымен қатар елдің аграрлық секторын тұрақты дамытуға қосылатын маңызды үлес. Жиналатын ақпараттың сапасы – ауыл шаруашылығы саясатын тиімді жоспарлаудың, азық-түлік қауіпсіздігін бағалаудың және мемлекеттік қолдау шараларын нақтылаудың негізгі факторы. Қарағанды облысында шамамен 10 мың ауыл шаруашылығы құрылымы мен 70 мың үй шаруашылығын қамтуды көздеп отырмыз. Бюро, жергілікті атқарушы органдар және аумақтық бөлімшелердің бірлескен жұмысының нәтижесінде санақ жоғары деңгейде өтетініне сенімдімін, – деді Мақсат Тұрлыбаев.

Сапар барысында ол ауылдық әкімдікте орналасқан өзіне-өзі қызмет көрсету бұрышына барып, тұрғындардың онлайн сауалнамаға қатысу үдерісін бақылады, белсенділік танытқан азаматтарға алғысын білдірді.

Сондай-ақ, бюро басшысы Есіл ауылындағы «Ясная поляна» шаруа қожалығының жұмысымен танысты. Аталған қожалық отыз жылдан астам уақыттан бері дәнді дақылдар өсірумен айналысып келеді. Қожалық ауыл халқын тұрақты жұмыс орындарымен қамтып, өңірлік ауыл шаруашылығы өндірісіне айтарлықтай үлес қосып отыр.

Еске сала кетейік, елімізде 1 тамызда басталған ұлттық ауыл шаруашылығы санағы 20 қазанға дейін жалғасады. Санаққа бүгінгі күнге дейін 480 мыңнан астам респондент  қатысып үлгерген. Бюро басшысы айтқандай, нәтижесі маңызды мемлекеттік шешімдерге негіз болатын, саланың стратегиясын айқындайтын ауыл шаруашылығы санағына жауапкершілікпен қарағанымыз абзал.

Болатбек ӘШІМҰЛЫ

Осакаров ауданы