«Сайрандап еркін өскен ұланың ем…»
Биыл «Орталықтың» ардагері, жазушы, сатирик, Қазақстан Жазушылар одағының мүшесі Сүйіндік Жанысбай 75 жасқа келіп отыр. Осыған орай облыс аумағында түрлі форматтағы шаралар басталды. Соның алғашқысы – Абай атындағы облыстық балалар кітапханасында өткен оқырмандармен кездесу кеші. Кездесу облыстық мәдениет, архивтер және құжаттама басқармасы қолдауымен ұйымдастырылған.
Шараны облыстық мәдениет, архивтер және құжаттама басқармасы басшысының орынбасары Ерлан Нілдібаев құттықтау сөзімен ашты. Басқарма басшысы Еркебұлан Жұмакеновтің арнайы құттықтау хатын табыстап, иығына шапан жапты.
Сүйіндік Жұмабайұлының өмірі мен шығармашылығы туралы «Saryarqa» телеарнасы ұсынған бейнежазба да көпшілікті бей-жай қалдырмады. Жазушы өмірінен бірқатар құнды деректі жайып салды.
Кездесуге жазушының еңбек жолдары бір арнада тоғысқан, қадірлі әріптестері де арнайы келді. Атап айтсақ, Қазақстанның Құрметті журналистері Аман Жанғожин, Әли Тойжігіт, Сағат Батырхан және басқа да құрметті қонақтар есті естеліктерімен бөлісті. Сүйіндік Жұмабайұлының қаламға адалдығы, азаматтығы мен іскерлігі хақында тұшымды пікірлерін ортаға салды. Қызықты оқиғалар да назардан тыс қалған жоқ.
Әбілқас Сағынов атындағы Қарағанды техникалық университеті Ш.Құдайбердіұлы атындағы үштұғырлы тілдер орталығының қызметкері Амангелді Жүнісбеков те қаламгердің сан қырлылығын тілге тиек етіп, денсаулық, қаламына қуат тіледі.
Кездесудің сұрақ-жауап бөлігінде балалар жазушыға сұрақтар қойып, оның балалық шағына саяхат жасағандай болды.
Сүйіндік Жұмабайұлы барлық қалам иелері сынды әдебиеттегі жолын өлең жазудан бастаған. Мектеп қабырғасында оқып жүргенде-ақ өлеңдері жариялана бастаған. Бұл туралы да кеш иесі өткенін тебірене еске ала отырып, әңгімелеп берді.
Жас оқырмандар Сүйкеңнің «Туған жер» тақырыбындағы жырларынан үзінді оқығанда автордың өзі толқып отырды. Кез келген қаламгер үшін мұнан асқан бақыт бар ма?..
Жазушы зертханасына үңілсеңіз, түрлі жанрдағы қалам сілтеуіне куә боласыз. Атап айтсақ, поэзия, публицистика, сатира, проза бағытында аянбай ұзақ жыл тер төгіп, қазақ әдебиетіне қалтқысыз қызмет етті. Атақ, мансапқа қызыққан жоқ. Сол биязы қалпынан танбай, бар сырын қара сиядан ақ қағазға төкті. Оны біз жазушының жарыққа шыққан 30-дан астам кітабынан көреміз. Ал, аударма саласындағы еңбегі – бір төбе.
– Алтайлық авторлардың «Алтай ертегілері» кітабын аудардым. Себебі, алтайлықтардың бізге ұқсастығы көп. Тілінде, дүниетанымында, наным-сеніміндегі біршама сәйкестікті байқадым. Олар да Алтайды түрік жұртының атамекені деп есептейді. Сондықтан, осы ертегілердің қазаққа берері мол деп есептеймін. Мұнда әр қазақ баласын қызықтырып жүрген біраз сұраққа жауап бар, – дейді Сүйіндік Жұмабайұлы.
Сонымен қатар, кеш иесі қазіргі көркем аударма жөніндегі пікірін де іркіп қалған жоқ. Оның түрлі эмоцияға толы, әзіл мен қағытпа әңгімелері, ел аузынан жиғандары да баршылық. «Ақылбайдың ала қабын» келешекте әзілдермен толықтыратынын айтады. Кейіннен шыққан «Білгенге маржан» атты танымдық еңбектен көп мағлұмат аласыз. «Тұзақ», «Өкіл әке» атты аудармаларынан өмірді көресіз. Ал, фотожурналист Валерий Петуховпен бірігіп, қазақ, орыс, ағылшын тілдерінде шығарып жатқан қазыналы Қарағанды туралы фотоальбомының кейінгі томын жұртшылық асыға күтіп отыр.
Бұдан бөлек, жазушы отауының ұйытқысы, балаларының ардақты анасы, сүйікті жары, қазақ телевизиясының ардагері Нұрғайым Әліпбекова да осы кештің арнайы қонағы болғанын атап айтқан жөн.
Тағылымды кеште әуелете ән де шырқалды, күмбірлете күй де тартылды.
Кездесу соңында кітапхана басшысы Баян Қуанышқызы қаламгерге алтын уақытын қиып келгені үшін алғыс айтып, шығармашылық табыс тіледі. Ұжым атынан Алғыс хат пен естелік сыйлық табыстады.
Жәлел ШАЛҚАР,
Ortalyq.kz
