«Сайлаушылардың саяси белсенділігі қуантады»
AMANAT партиясы Қарағанды облыстық филиалының атқарушы хатшысы Бекзат Алтынбеков осылай дейді.
Облыс орталығындағы №17 сайлау учаскесінде дауыс берген Бекзат Қомарұлы газет тілшісімен бүгінгі сайлаудың тарихи маңызы жайында ой бөліскен еді.
– Мен бүгінгі сайлауда қарапайым халық арасында сайлау мәдениетінің қалыптаса бастағанын аңғардым. Белсенділік – өте жоғары. Бұл дегеніңіз – әрбір азамат елдің ертеңіне бейжай қарамайды деген сөз. Әрбір қазақстандық өзі берген даусының тарихи жауапкершілігін сезіне алатындай сергектік танытуда.
Жалпы, бұл сайлау – Қазақстанның даму жылнамасындағы тарихи сайлау. Ұлы өзгеріс, жаңа дәуірмен бетпе-бет келіп тұрған мемлекетіміздің тағдыры тарих таразысында тұр. Тіпті, сайлау қарсаңында бірнеше саяси күштердің бірігіп, ортақ мақсатқа – халықтық коалиция төңірегіне жұмылуының өзі бүгінгі сайлаудың тарихи мәнін танытса керек. Бүгінгі сайлаудағы халықтың саяси белсенділігі арқылы біз қуанып, сайлау алдындағы жұмыстарымыздың нәтижесін көріп отырмыз, –деді Бекзат Алтынбеков.
Сондай-ақ, ол бұл сайлаудағы бірінші жеңіс халықтың ауызбірлігіне тиесілі екендігін ерекше атап өтті.
