Сұлтан Дәулетханұлының шығармашылық кеші өтті

Қарағанды қаласында Қазақстан Жазушылар одағының мүшесі, ақын Сұлтан Дәулетханұлының шығармашылығына арналған «Сағынышым, төрге шықшы, келші, өлең!» атты әсерлі кеш өтті. Кеш ақынның поэзияға деген сүйіспеншілігі мен рухани ізденісін, туған жер мен ата-анаға, Отан мен өмірге деген іңкәрлігін айшықтады.

Кеш ақынның «Келші, өлең!» бейнебаянымен басталып, автордың туған жерге, ата-анаға, өмір мен өлеңге арналған жырларымен өрбіді. Ақын көрерменге «Мен туған күн», «Тартыс», «Тал бесік» сынды туындыларын оқып, киелі бесік жайлы әсерлі әңгімесімен бөлісті.

Кештің «Бақытым да байлығым – солар менің» атты бөлімінде Арайлым Жүкенова ақынның анасына арналған «Дұға» өлеңін орындады. Сондай-ақ «Әкелер» әні шырқалып, ата-анаға деген құрмет көрініс тапты.

Жас оқырмандар ақын өлеңдерін мәнерлеп оқып, «Мирас» өнер мектебінің оқушылары «Біз Мирас өреніміз» әнін орындады.

Кеш барысында ақынның шығармашылығына араналаған «Боран» және «Менің дертім – сағыныш» өлеңдері оқылды.

Шара соңында Сұлтан Дәулетханұлының жаңа жыр жинағының тұсауы кесілді. Жиынға өңір мен елге танымал ақын-жазушылар, мәдениет қайраткерлері қатысты.

Кеш қорытындысында дәстүрлі әнші Саян Мұздыбайдың «Құс қанатындағы сағыныш» әні орындалып, әдеби кеш көрермен жүрегінде ұзақ сақталды.

 Жамал АКПАРОВА