Құрметті Қарағанды қаласының тұрғындары және қала қонақтары!
Сіздерді Қазақстан халқының бірлігі күнімен шын жүректен құттықтаймыз! Тәуелсіз мемлекетіміз үшін бұл – маңызы зор мерекелердің бірі. Бейбіт өмірді, келісім мен тұрақтылықты басты құндылық санайтын барлық қазақстандықтар үшін осы мерекенің мән-мағынасы жоғары.
Қазақстан халқының бірлігі күні мерекесі барлық қазақстандықтардың достығы, ынтымақтастығы мен жасампаздығының белгісі болып табылады. Қоғамымыздағы бірлік, келісім және бейбітшілік – тәуелсіздік жылдарында қалыптасқан біздің басты жетістігіміз және көп ұлтты еліміз үшін басты бағдарымыз. Елбасымыз атап өткендей: «Бiз әлемге бiрлiгiмiз бен тәуелсiздiкке деген ерiк-жiгерiмiздi, азаматтығымыз бен отансүйгiштiгiмiздi паш етуге тиiспiз». Осы құндылықтар – Қазақстан Республикасы Конституциясының мызғымас нормалары мен гүлденген мемлекетіміздің тұрақтылығының негізі.
Бірлескен еңбек арқылы аға буынның үлесіне түскен қиындықтарды жеңіп, республика халқының ұлы қауымдастығы қалыптастырылып, оның заманауи бейнесі сомдалды. Елімізде 100-ден астам ұлт өкілдері бейбіт өмір сүруде, 600-ден астам этномәдени бірлестіктер қызмет атқаруда, олардың әрқайсысына туған тілін оқып-білуге, ұлттық мәдениеті мен салт-дәстүрін жандандыру мен дамытуға тең мүмкіндіктер берілген. Ұлтаралық қарым-қатынастар саласында мемлекеттік саясатты табысты іске асыратын қоғамдық институттардың бірі – Қазақстан халқы Ассамблеясының еліміздегі бейбітшілік пен келісімді тұрақтандыруға қосар үлесі ерекше.
Құрметті жерлестер!
Сіздерді Қазақстан халқының бірлігі күнімен шынайы құттықтау сөздерін қабыл алыңыздар!
Барлықтарыңызға зор денсаулық, көктемдей шуақты көңіл-күй, еңбекте табыс, отбасыларыңызға мол бақыт тілейміз. Туған жеріміздегі бейбітшілік, достық және өзара түсіністік пен сыйластықтың баянды болуына тілектеспіз!
Н.ӘУБӘКІРОВ,
Қарағанды қаласының әкімі.
Қ.БЕКСҰЛТАНОВ,
қалалық мәслихаттың
хатшысы.
