Үрімшіде Қарағанды облысының өкілдігі ашылды

Өкілдіктің негізгі міндеті – ҚХР-дан келетін инвесторларды сүйемелдеу, Қарағанды облысының кәсіпкерлеріне Қытай нарығына шығуға жәрдемдесу, жергілікті өнімді ілгерілету, сондай-ақ B2B-келіссөздер мен іскерлік кездесулер ұйымдастыру. Кеңсенің ашылуы бірлескен жобаларды іске асыру барысында туындайтын әкімшілік және коммуникациялық кедергілерді едәуір қысқартуға мүмкіндік береді деп күтілуде.

— Ең алдымен Қарағанды облысының кәсіпкерлеріне Қытай нарығына шығуға көмектесіп, инвесторларды тартуды көздейміз. Жаңа кеңседе біздің өкіліміз жұмыс істейді, ол барлық туындайтын мәселелерді шешумен айналысады. Толық ақпаратты Инвесторларға қызмет көрсету орталығынан +7-702-007-66-61 телефоны арқылы алуға болады, — деді Қарағанды облысының өнеркәсіп және кәсіпкерлік басқармасының басшысы Асқар Ғазалиев.

Өкілдіктің ашылуы Қарағанды облысы делегациясының Қытайға жасаған жұмыс сапарының қорытындыларының бірі болды. Өңір өкілдері Бейжіңде, Шыңжаң-Ұйғыр автономиялық ауданындағы Үрімші қаласында, сондай-ақ Цзинань (Шаньдун провинциясы) және Таншань (Хэбэй провинциясы) қалаларында болды. Делегация ірі индустриялық және логистикалық нысандарды аралап, бизнес пен билік өкілдерімен кездесулер өткізді.

Келіссөздер нәтижесінде энергетика, машина жасау, металлургия, логистика, авиация және экологиялық технологиялар салаларында ынтымақтастық туралы уағдаластықтарға қол жеткізілді. Атап айтқанда, Үрімші қаласында Шахтинск қаласында жаңа ЖЭО салу жөніндегі энергетикалық жобаны іске асыру туралы келісім жасалды.

Көлік инфрақұрылымын дамыту мәселесіне де ерекше көңіл бөлінді. Тараптар Қарағанды мен Үрімші арасында тікелей әуе қатынасын — жолаушылар және жүк рейстерін іске қосу мүмкіндігін талқылады. Бұл мәселе белсенді пысықтау сатысында тұр.

Сондай-ақ Қарағанды әуежайының карго-терминалын экспорттық-логистикалық бағытты дамыту үшін пайдалану мүмкіндіктері қарастырылды.

Цзинань қаласында Sinotruk, «Qaztehna» ЖШС және «Saran Machinery» ЖШС арасында Қарағанды облысында автокомпоненттер өндіру желісін, сервистік орталық пен өңірлік қосалқы бөлшектер қоймасын құру жөніндегі ниет туралы келісімге қол қойылды.

Таншань қаласында «Qaragandy Metallurgia Zauyty» ЖШС мен «Сарыарқа» арнайы экономикалық аймағында кабель зауытын салу туралы меморандум жасалды. Жоба өңірдің инфрақұрылымдық және өнеркәсіптік жобаларын қамтамасыз етуге бағытталған.

Сонымен қатар Қарағанды мен Таншань қалалары арасында бауырластық туралы меморандумға қол қойылып, бұл экономикалық, білім беру және мәдени алмасу үшін жаңа мүмкіндіктерге жол ашады.

— Маңызды нәтижелерге қол жеткіздік. Қол қойылған келісімдер Қарағанды облысының өнеркәсібі мен инвестициялық әлеуетін одан әрі дамытуға берік негіз қалайды. Алдағы кезеңде барлық қол жеткізілген уағдаластықтарды іс жүзінде жүзеге асыру бойынша жауапты жұмыс күтіп тұр, — деп атап өтті Қарағанды облысының әкімі Ермағанбет Бөлекпаев.

Жұмыс сапары инвестиция тартуға, Қытаймен бірлескен өнеркәсіптік жобаларды дамытуға және Қарағанды облысы кәсіпорындарының өнім экспортын кеңейтуге бағытталды. Инвестициялық ынтымақтастықты күшейту жұмыстары Қазақстан Президентінің тапсырмалары аясында жүргізілуде.

Қарағанды облысы әкімдігінің баспасөз қызметі