Рейс кешіккені үшін өтемақыны қалай алуға болады?

Азаматтық авиация комитеті мәліметінше, “Қазақстан Республикасының әуе кеңістігін пайдалану және авиация қызметі туралы” заңның 86-бабына сәйкес рейс кешігуіне әуекомпания кінәлі болған жағдайда әуе кемесі кеш келуіне байланысты тасымалдаушы мынаған міндетті:

Жолаушыларға аралық пункттерде салқын сусындар беру;

Кешіккен уақытына байланысты ыстық тамақпен қамтамасыз ету;

Кешіккен уақытына қарай қонақүй ұйымдастыру;

Қажет болған жағдайда әуежайдан қонақүйге және кері трансфер беру.

Ақшалай өтемақыны қалай алуға болады?

Заңға сәйкес жолаушылар ақшалай өтемақы алуға да құқылы.

– Жолаушыны межелі жерге кеш жеткізгені үшін тасымалдаушы әр кешіккен сағат үшін тариф (кешіккен ұшу учаскесінің тарифі) құнының үш пайызын айыппұл ретінде төлеуге міндетті. Сонымен қатар, жолаушы кешігуіне байланысты шығынға ұшыраған жағдайда да өтелуі қажет. Айыппұлдың жалпы сомасы сатып алынған тарифтің (ұшу учаскесінің тарифінің) құнынан аспауға тиіс, – деп түсіндірді ААК өкілдері.
Өтемақыны қалай алуға болады?

Егер рейсіңіз кешігіп, тиісті өтемақы немесе қызметтерді алғыңыз келсе:

Әуекомпания өкілдігіне жүгініп, қажет қызметтерді талап етіңіз.

Барлық құжатты сақтаңыз: отырғызу талоны, билет, қосымша шығындарға (тамақ, қонақүй) кеткен чектер.

Егер тасымалдаушы өз міндетін орындаудан бас тартса, жазбаша шағым жіберіңіз.

Егер шағым қанағаттандырылмаса, Азаматтық авиация комитетіне немесе сотқа жүгінуге болады.

– Осы бапта көзделген талаптарды бұзған тасымалдаушылар Қазақстан заңнамасына сәйкес жауапқа тартылады, – деді ведомство өкілдері.

Материалды әзірлеген: Ілияс ДҮНГЕНБАЙҰЛЫ.