Ел тұрғындары Құрбан айтқа орай 17 маусым күні демалмайтын болды

Дүйсенбі, 17 маусым жұмыс күні болмақ. Бұл туралы Еңбек және халықты әлеуметтік қорғау министрлігі хабарлады. Бұған дейін 17 маусымда қазақстандықтар қосымша бір күн демалатыны туралы айтылған болатын. Өйткені Құрбан айттың бірінші күні осы күнге сәйкес келеді. Алайда бүгін Қазақстан мұсылмандары діни басқармасы (ҚМДБ) мерекенің бір күн бұрын – 16 маусымда басталатынын хабарлап, Құрбан айт мейрамына қатысты түсінік берді.

– Бүгін һижри жыл санауы бойынша зул-хижжа айы басталды. Яғни Арапа күні биыл 15 маусымға сәйкес келеді. 16 маусым – Құрбан айт мерекесінің бірінші күні, – делінген хабарламада.

Діни басқарманың ақпаратына сүйенсек, ислам дінінде қасиетті күндер, түндер және айлар қамари жыл санауы негізінде анықталады. Мұндай жыл санақ ай фазасының өзгеруіне қарай есептеледі. Жаңа айдың (һиләлдың) көрінуімен жаңа ай басталады. Қамари ай кейде 29 не 30 күн болады. Зул-хижжа айын анықтау үшін зул-қағда айының 29-нда айды бақылайды. Күн батқан кезде жаңа ай көрінсе, келесі күні зул-хижжа айы басталады. Егер ауа бұлтты болып, ай көрінбесе, зул-қағда айын 30 күнге толықтырады.

– 2024 жылы 6 маусымда жаңа айдың көрінуіне байланысты биыл зұлхижжа айы 7 маусымда басталып, арапа 15 маусымға, ал құрбан айт 16 маусымға сай келеді, – дейді басқармадан.

Сондай-ақ Еңбек және халықты әлеуметтік қорғау министрлігі түсініктеме берді.