Әр үйге сәуле болып шашылғандар
Көктемнің шуақты мерекесі де өзінің сән-салтанатымен келіп қалды. Нәзікжандардың бір мезгіл құшағы гүлге, жаны нұрға бөленеді. Күні кеше аймақ басшысы Ермағанбет Бөлекпаев сан салада еңбек етіп жүрген әйелдер қауымымен кездесіп, ашық әңгіме өрбітті. Халықаралық әйелдер күніне орай өткен мерекелік жиында облыс әкімі көпбалалы аналарға «Алтын алқа», «Күміс алқа» тақты.
Шуақты мерекенің құрметіне орай Президент Жарлығымен аймағымыздағы 8 көпбалалы ана «Алтын алқа», 39 ана «Күміс алқа» иегері атанып отыр. Бұл басқосуда аймақ басшысының қолынан «Алтын алқаны» алу бақыты Закира Мұқымбекқызы мен Ғалия Қашаубаеваға бұйырды. Ал, «Күміс алқамен» Светлана Жұмаділова мен Венера Кентаева марапатталды.
Аймақ басшысы Президент жолдаған құттықтау хатты филология ғылымдарының докторы, профессор, қоғам қайраткері Нұрсұлу Букетоваға табыстады. Е.Бөкетов атындағы Қарағанды университетінің саясаттану және әлеуметтану кафедрасының аға оқытушысы, әлеуметтану магистрі, әйелдер істері және отбасылық-демографиялық саясат жөніндегі облыстық комиссияның мүшесі Татьяна Резвушкинаны Ұлттық комиссияның Алғыс хатымен марапаттады.
– Аналардың мерекесі – өмірдегі ең ізгі мерекенің бірі. Себебі, ана – әрбір адам үшін ең аяулы, ең ардақты жан. Дүниеде анадан қымбат, анадан асыл жан жоқ. Бар жылуын бала тәрбиесіне арнайтын да, отбасылық дәстүрді сақтайтын да аяулы аналарымыз бен асыл әжелеріміз. Сондықтан Аналар мерекесі – біздің барлығымыз үлкен қуанышпен қарсы алатын жақсы бір мерекеміз. Болашағын ойлаған ел, ең алдымен, әйелдерге құрмет көрсетеді. Бұл – өмірдің бұлжымас заңы, – деді өзінің құттықтау сөзінде Ермағанбет Қабдулаұлы.
Мемлекеттік марапаттарды табыстаған соң әкім жиынға қатысушы жандармен ашық әңгімелесті. Президенттің құттықтауын алған профессор Нұрсұлу Букетова алғыс білдіріп, әйелдердің қоғамдағы орны мен беделі жөнінде сөз қозғай өтті.
Балқаш қаласы Аналар кеңесінің төрағасы Альмира Мусина бала тәрбиесі жайлы айтса, бес баланың анасы, оның ішінде үш қызы спорт шеберлігіне үміткер Мария Оспанова отбасы құндылығы жөнінде әңгімеледі.
«Batyl Jurek» қоғамдық қорының Саран қаласындағы филиалының басшысы Бибігүл Стецко қордың атқарып жатқан жұмыстарына тоқталды.
Қазақстан Республикасының жүзу спорты бойынша еңбек сіңірген жаттықтырушы Евгения Владимировна қазіргі уақытта параспортшыларды дайындап жатыр. Былтыр Азия ойынынан жүлделі орын алған Роман Потаповты жаттықтырған. Жүзу спортына көрсетіліп жүрген мемлекет қамқорлығына ризашылығын жеткізді.
Қарқаралыдағы «Арман» шаруа қожалығының басшысы, кәсіпкер Наталья Александровна да жиында сөз алды. Мемлекеттік тілде еркін көсілген бес баланың анасы ауыл тіршілігіндегі ананың атқарар рөлін сөз етті.
Елу жылға жуық Осакаров аудандық ауруханасында дермато-венерологиялық кабинетінің медбикесі болып қызмет еткен Раиса Ильваниди ауыл медицинасына айрықша назар аударылғанын айтып, алғысын білдірді. Қарағанды университеті морфология кафедрасының профессоры Майда Түсіпбекова да медицина төңірегінде сөз қозғады.
«Тазалық Эксперт» ЖШС қызметкері Дидар Әбдікәрімова да мерекелік кездесуге шақырту алғанына алғысын білдіріп, «көше тазалығымен қоғам боп күресуіміз қажет» деді.
Шет ауданы, Жоғарғы Қайрақтыға қарасты Майбас қыстағында жолдасына қолғабыс етіп, трактор теуіп, шөп шабатын Арайлым Байдашова шаруашылықтарының алдағы жоспарларымен бөлісті.
Мерекелік кездесу соңында Осакаров аудандық мәдени-демалыс орталығының музыкалық жетекшісі Анаргүл Наурызхан «Абзал ана» әнін шырқап берді. Жаны жадыраған меймандар Кеншілер Мәдениет сарайында өтетін мерекелік концертке жол тартты.
Қасымхан БҮРКІТҰЛЫ,
Ortalyq.kz
