Президент кеңесшісі «Айсұлу» операсын тамашалады
Қарағанды академиялық музыкалық комедия театрында С.Мұхамеджановтың «Айсұлу» концерттік нұсқасындағы операсының тұсаукесері өтті. Премьера тарихи-мәдени мұраны сақтау, дамыту және насихаттау мақсатында композитор Сыдық Мұхамеджановтың 100 жылдығына орай ұйымдастырылған. Операны Қарағандыға іссапармен келген Президент кеңесшісі Мәлік Отарбаев, сонымен қатар облыс әкімінің орынбасары Ерлан Құсайын арнайы тамашалады.
Қарағанды академиялық музыкалық комедия театрының 50 жылдық тарихы бар. Осыншама жыл ішінде репертуарына 300-ден астам қойылымды кіргізген. Репертуарындағы қойылымдарының басым бөлігі – әлемдік классикалық опереттаның інжу-маржандары, заманауи спектакльдері. Ал, бүгін театрдың қоржыны қазақша «Айсұлу» операсымен толықты.
Аталған операның қоюшы-дирижері – Қазақстанның еңбек сіңірген қайраткері Абзал Мұхитдинов (Астана қ.). Концерттік қойылымның қоюшы режиссері – ГИТИС түлегі, «Нано-Опера» V халықаралық опера режиссерлерінің лауреаты (Мәскеу қ.), «Астана опера» театрының режиссері – Еренбақ Тойкенов (Астана қ.). Концертке «Астана Опера» МОБТ шақырылған солист Ержан Саипов, сонымен бірге ҚАМКТ солистері, симфониялық оркестр және хор (бас хормейстер Наталья Кряжева) қатысты.
Айта кетейік, тарихы терең театрдан түлеп ұшқан ҚР еңбек сіңірген қайраткері Елена Филинкова, халықаралық фестивальдің дипломанты Анна Беспалова, халықаралық байқаулардың лауреаты Маржан Бұланова, халықаралық байқаулардың лауреаты Денис Кудрящов, «Мәдениет саласының үздігі» төсбелгісінің иегері Александр Бойко және басқа да көптеген халықаралық фестивальдердің жеңімпаздары әлемдік сахналарда ел абыройын асқақтатып жүр.
Сонымен қатар, театр жыл сайын «ДосStar» ашық халықаралық оперетта және мюзикл фестивалін және қуыршақ театрларына арналған халықаралық «Кукляндия» фестивалін ұйымдастырып келеді. Жақында ғана балалар күніне орай ұйымдастырылған фестивальде Ресей, Қытай, Өзбекстан, Эстония елдерінен келген қуыршақ театр ұжымдары өз өнерлерін қарағандылықтардың назарына ұсынған еді.
Ербол ЕРБОЛАТ,
Ortalyq.kz
