«Сарыарқа» хоккей клубы ел чемпионатының плей-офф кезеңін сәтті бастады

Жерлестер бұл кезеңде рудныйлық «Горнякпен» алғашқы кездесуінде – 6:2, қарымта ойында 5:1 есебімен жеңіске жетті.

«Сарыарқа» бұл жолы барын салды. Алғашқы кездесуде ойын басталысымен-ақ соққыны қарша боратып, қарсыластарға шайба бермеді. Нәтижесінде, 2-ші минутта – Егор Кузьменко, 4-ші минутта – Александр Борисевич, 5-ші минутта Сергей Барбашев бірінен соң бірі қарсылас қақпасынан саңылау тапты. Бұдан кейін ойынның 12-ші минутында Руслан Демин төртінші шайбаны салып, небәрі бірінші айналымда есепті 4:0-ге жеткізді.
Екінші айналымда да қарағандылықтар бірінші болып есеп ашты. Бұл жолы 23-ші минутта Данила Карабан көзге түсті. Одан кейін 26-шы және 51-ші минутта рудныйлықтар екі шайба салып, есеп алшақтығын қысқартпақ болып еді. Екі минуттан соң Егор Кузьменко ойындағы екінші шайбамен кездесуге нүкте қойды. Есеп – 6:2.
Қарымта кездесуде, керісінше, рудныйлықтар есеп ашты. Ойынның 9-шы минутында қарағандылықтардың қақпасынан саңылау тауып, есепте алға шыққан еді. Бірақ, қарсыластардың қуанышы ұзаққа созылмады. 13-минутта – Александр Борисевич, 14-ші минутта – Никита Баженов көзге түсіп, командасын оқ бойы озық шығарды. Бұдан кейін қарағандылықтар із суытпай, шайбаны қақпаға тоғытып, қарымта ойында да қарсыласынан басым түсті. 28-ші минутта – Виталий Шульга, 42-ші минутта – Никита Баженов, 59-шы минутта – Руслан Демин шайба салып, командасына жеңіс сыйлады.
Енді қос қарсылас наурыз айының басында сырт алаңда қайтадан қарымта кездесу өткізеді. Онда «Сарыарқа» сырт алаңда ойнайды.

Ербол ЕРБОЛАТ,
«Ortalyq Qazaqstan»