Отбасы құндылығы дәріптелді
«Біртұтас тәрбие бағдарламасы» аясында мектептегі ата-аналарды қолдау орталығы «Даналық мектебінің» жұмысын жандандырды. Әже өсиеті мен ата ақылын насихаттап, «Туыстық қарым-қатынас – баға жетпес байлық» тақырыбында аталармен дөңгелек үстел өткізді.
Оған Қайдар Қарақонысов ақсақал немересі Айсанамен, Сатыбалды Еркебаев ақсақал немересі Асылаймен қатысты. Аталар балаларға жеті ата ұғымындағы ағайын арасындағы бірлік, татулық, сыйластық мәселесінде ақыл-кеңес беріп, ойларымен бөлісті.
– Қазіргі отбасы тәрбиесінде баламен рухани үндестікке, үйлесімділікке ұмтылу қажет. Ата-баба мұрасын, халықтың тәлімін сақтауға көңіл бөлу – отбасы татулығын арттырады.
«Ұяда не көрсең, ұшқанда соны ілерсің» деген. Отанның отбасынан, тәрбиенің талбесіктен екенін ескеретін осындай шаралар легі жалғасын тапса, нұр үстіне нұр.
Бала жетістікке жету үшiн әуелі үлкендер өздері отбасында iс-әрекет, мiнез-кұлқымен үлгі болуы тиiс. Баланың қателігін түсініп, дұрыс тәрбиелеудің әсері үлкен. Егер ата-анасы жақындарымен сыпайы қарым-қатынаста болса, жақсы кітап, кино, шығармалар жайлы әнгімелеп отырса, баланың дүниетанымы кеңейе түседі.
Қазақта «Бір жылдығыңды ойласаң, егін ек, жүз жылдығыңды ойласаң, тал отырғыз, мың жылдығыңды ойласаң, ұрпақ тәрбиеле» деген сөз бар. Жалпы, ұстаз бен ата-ана арасындағы тығыз қарым-қатынас бала өміріне ерекше ықпал етеді. Бүгінгі ұстаздар осындай елдің баласын тәрбиелеп, болашағы үшін білімді әрі білікті жас ұрпақты тәрбиелеп жатқан жайы бар, – деді ақсақал Сатыбалды Еркебаев.
Бүгінгі таңда «Даналық мектебінен» күтілетін нәтиже – ата-ана мәдениетін қалыптастыру. Оның ішінде, «мұғалім – оқушы – ата-ана» үштігінің мектептегі ілім мен тәрбие шеңберінде бірлесе жұмыс істеуі – саналы ұрпақ тәрбиелеу бағытында өз жемісін беруде.
Бала тәрбиесінде отбасы – ең үлкен мықты тәрбие ошағы. Жас ұрпақтың адамдық қасиеттері мен әдептілігі, оның болашақта қандай адам болуы отбасында алған тәлім-тәрбиесі мен ондағы қарым-қатынасқа тікелей байланысты. Бұл орайда ата – әрқашан басты ұстаз. Әр баланың заманға лайық азамат болып өсуі – абзал тәрбиесінің жемісі.
Кәмшат ҚАПАСОВА,
Қызыларай орта мектебінің әлеуметтік педагогы
Ақтоғай ауданы
