Орталық саябақта Ата Заңның 30 жылдығына арналған форум өтуде
Әлихан Бөкейхан атындағы ауданның Орталық саябағында Конституцияның 30 жылдығына арналған облыстық форум өтуде. «Ата Заңға 30 жыл: Тәуелсіз мемлекеттің берік тұғыры» ұранын ұстанған бұл шара Конституцияның басты қағидаттары – заң үстемдігі, құқықтық тәртіп пен тұрақтылықты дәріптеуде.
Форум аясында алдымен құқықтық кеңес беру жәрмеңкесі басталды. Оған Қарағанды облысының Әділет департаменті, Экономикалық тергеп-тексеру департаменті, облыстық Төтенше жағдайлар департаменті, Е. Бөкетов атындағы Қарағанды ұлттық зерттеу университеті, Қазтұтынуодағы Қарағанды университетінің өкілдері қатысты.
Қала тұрғындары мен қонақтары түрлі құқықтық мәселелер бойынша кеңес алды.
Форумда қарағандылықтарды облыс әкімі Ермағанбет Бөлекпаев құттықтады.
–Баршаңызды еліміздегі аса маңызды мереке – Конституция күнімен, Ата Заңымыздың 30 жылдығы мерекесімен құттықтаймын. Ата Заң – тәуелсіз мемлекетіміздің құқықтық тірегі. 30 жылдық тарихы белес – бұл тұтас бір буынның дүниеге келіп, білім алып, отбасын құрып, кемеліне келер шағы. Осы 30 жылда тәуелсіздік ұрпағы өсіп жетілді. Осы аралықта ел жаңарды, қоғамдық сана өзгерді. Президент Заң үстемдігі орнаған әділетті мемлекет құру әр азаматқа байланысты екенін жиі айтып жүр. Қасым-Жомарт Кемелұлы атап өткендей, заң мен тәртіп – мемлекет тұрақтылығының негізі. Бұл қағида қоғамдағы барша азаматқа ортақ жауапкершілікті қалыптастыруды көздейді. Әрқайсымыз Заңға бағынғанда ғана қоғамның барлық саласында тәртіп орнайды, – деді Ермағанбет Бөлекпаев.
Облыс әкімі құттықтауынан кейін Полиция департаменті мен «Орталық» өңірлік қолбасшылығының қызметкерлері ведомстволық наградалармен марапатталды. Ең үздік учаскелік инспекторларға облыс әкімінің 2 миллион теңге көлеміндегі сыйақысы табысталды.
–Ата Заңымыздың 30 жылдығы мерекесіне орай облыс әкімінің марапатына бөлендік. Бұл біз үшін үлкен мәртебе. Заң мен тәртіпті негізге алып жұмыс атқарамыз. Қоғамда тәртіптің сақталуына мүлтіксіз қызмет етеміз, – деді Оңтүстік-Шығыс полиция бөлімінің учаскелік полиция испекторы Серіжан Жандосұлы.
Сондай-ақ, форумда жоғары оқу орындарына түскен талапкерлерге облыс әкімінің білім гранттары тапсырылды.
Мемлекеттік қызмет ардагерлеріне де ведомстволық награда табысталды.
Бағдарлама аясында алғаш рет мемлекеттік қызметке кірген жас мемлекеттік қызметшілердің ант қабылдау рәсімі ерекше мәнге ие болды.
Бұл ұрпақтар сабақтастығының символы және заң мен адалдық негізінде мемлекетке қызмет етуге дайын екендігінің дәлелі. Форумда «МузАрт» тобының концерті қонақтарға көтеріңкі көңіл-күй мен бірлік атмосферасын сыйлады.
Мағжан ҚҰДАЙБЕРГЕН
«Ortalyq Qazaqstan»
