Жаңалықтар

Қоршаған ортаға қамқорлық

Қарағанды қаласының Жастар ресурстық орталығы және «Жасыл ел» қалалық штабы онлайн форматта дәстүрлі «Тазалық кубогы» байқауын өткізді. Оған колледждер және жоғары оқу орындарының 570 студенттері мен мектеп оқушылары қатысты. Бес студент үздік атанды.

– Осындай байқауды өткізе отырып, біз қоршаған ортаға қамқорлық жасаудың маңыздылығы туралы кезекті рет еске салғымыз келеді. Қатысушылар экология, география және тарих бойынша сұрақтарға жауап берді. Әділқазылар алқасы дұрыс жауаптардың санын ғана емес, madtest жүйесі есептеген әрбір сұраққа жауаптардың жылдамдығын да бағалады, – деді Қарағанды Жастар ресурстық орталығының жетекшісі Сымбат Әубәкірова.

Байқау қорытындысы бойынша бес жеңімпаз анықталды. Ең жылдам Қазтұтынуодағы Қарағанды университетінің студенті Зарина Смаилова болды. ІІ орында индустриалды-технологиялық колледж оқушысы Нұрай Байымбет. ІІІ Ж.К.Бөкенов атындағы банк колледжінің студенті Тимур Декайло болды. IV орынды Темір жол колледжінің студенті Айсара Сайлауова, ал V орынды Ж.К.Бөкенов атындағы банк колледжінің студенті Әлихан Туғанбаев иеленді. Жеңімпаздар дипломдармен және бағалы сыйлықтармен марапатталды.

Өз тілшімізден.

Басқа материалдар

Back to top button