Онлайн несие қатерінен сақтану керек

Онлайн несие алу кезінде алаяқтық әрекеттер болуы мүмкін екенін естідім. Мұндайға тап болмас үшін онлайн несие беретін ұйымдардың жұмыс істеу шарты туралы білгім келеді.

Ақмарал БЕЙСЕНБАЕВА.

АҚТОҒАЙ ауданы.

Онлайн несие беретін ұйымдардың жұмысы ҚР Азаматтық кодексінің 725-1-бабында көрсетілген. Бұл бап заңға 2018 жылдың 2 шілдесінде енген. Онда қарыз алушы мен жеке тұлға арасында жасалатын қарыз шартының ерекшеліктері көрсетілген. Шарт жасасқанда несие мерзіміне, жылдық сыйақы мөлшеріне, төлем мерзімі кешіктірілген жағдайда төленетін айыппұл мөлшеріне назар аудару керек.

Егер де тұтынушы негізі бар себептермен несиесін төлей алмай жатса, онда ол сол ұйымға хабарласып, өзінің жағдайын егжей-тегжейлі түсіндіріп, несиенің төлем уақытын создыру жайлы өтініш түсіруі керек.

Бұл ретте қарыз алушы қарызын уақытында өтей алмаса, оған (айыппұл, өсiмпұл) өткен әрбір күн үшін кешіккен сомадан тек 0,5 пайызы есептеледі. Ал, бір жылдағы айыппұл мөл шері жалпы несие сомасының он пайызынан аспауы тиіс. Жоғарыда келтірілген заңға сүйенсек, егер бір адам онлайн несие беретін ұйымнан 100 мың теңге алса, кесте бойынша уақытында 10 мың теңге қайтарылмаған жағдайда ол әрбір күнге осы сомадан 50 теңге өсімпұл ретінде төлеуі тиіс болады. Сондай-ақ, осы заңда айыппұлдың немесе өсiмпұлдың бір жылда қарызға берілген сомадан 10 пайызынан аспауы тиіс екені көрсетілген. Яғни, біздің мысал бойынша ол бір жылда 10 мың теңге.

Несие рәсімделген компания шетелдік болса, онда шарты басқа. ҚР «Микроқаржы ұйымдары туралы» Заңына сайкес микроқаржы ұйымдары – ҚР Ұлттық банктің реттеуінде және бақылауында.

Әйгерім НҰРЛАНХАНОВА,

заңгер.