Облыстағы барлық курорттық аймақтарда санитарлық бақылау мен туристер қауіпсіздігі күшейтіледі
Мемлекет басшысы Үкіметке қысқа мерзім ішінде елдегі барлық туристік бағыттың жағдайын ретке келтіріп, олқылық жіберген лауазымды тұлғаларды жауапкершілікке тартуды тапсырды. Бұл туралы Президент кеңесшісі — баспасөз хатшысы Руслан Желдібай хабарлаған болатын. Облыс әкімі Ермағанбет Бөлекпаев мемлекеттік органдар мен ведомстволар өкілдерінің қатысуымен жиын өткізіп, инфрақұрылым, сервис, баға, қауіпсіздік сияқты барлық бағыттар бойынша проблемалар белгіленді.
– Мемлекет басшысы туристер келетін орындарды тәртіпке келтіруді тапсырды. Маусым қызу жүріп жатыр, сондықтан барлық кемшіліктерді тез арада түзету керек. Өткен демалыс күндері Балқашта қалыптасқан жағдай күрделі мәселе туғызып, барлық мемлекеттік органдардың қатаң назарын талап етеді, – деді Ермағанбет Бөлекпаев. – Жыл сайын біз демалушылардың ағынын байқаймыз. Бірақ іс жүзінде сервис пен инфрақұрылым деңгейі бұрынғысынша сәйкес келмейтінін көріп отырмыз. Адамдар бұл мәселелерді орынды көтереді.
Ол өз аймақтарын күтіп ұстауға қатысты бизнестің жауапкершілігі үлкен екенін атап өтті.
– Біз сервитуттар жасадық – енді әркім жағажайға еркін бара алады. Бірақ бизнес не істеп жатыр? Көптеген кәсіпкерлер аумақтың жағдайын қадағалауды тоқтатып, бәрін әкімдікке жүктеді! – деді облыс әкімі. – Мысалы, Торанғалықта бір жағалау сызығы 16 кәсіпкерге бөлінген, нәтижесінде құтқару бекеттері де, медпункттер де жоқ! Егер жалға алушылар өз аймақтарын қалыпты ұстауды қамтамасыз ете алмаса, мұндай жағажайларды коммуналдық меншікке қайтарамыз.
Сондай-ақ, демалушыларға өз катерлері мен скутерлерін ұсынатын кеме иелеріне қатаң бақылау орнату қажет. Судағы ойын-сауық демалушылардың қасында орналасқан, бұл қауіп тудырады.
Тағы бір мәселе – қызмет көрсету саласы мен баға саясаты, кәсіпкерлер бағаны қалай қаласа солай көтереді. Мемлекеттік кірістер департаменті туристік бизнестің ашық болуы үшін құқықтық алаң аясында жұмысты күшейтуі қажет. Сервиске келетін болсақ, бизнестің өзі оны дамытуға мүдделі болуы тиіс. Туризм басқармасы шеберлік сабақтарын өткізу бойынша қолдау көрсетуге дайын.
Санитарлық инфрақұрылым да назардан тыс қалған жоқ. Қарағанды – Балқаш тас жолында дәретханалардың жоқтығына қатысты шағымдар көп. «ҚазАвтоЖол» жоспарланған төрт санитарлық-тұрмыстық пункттің біреуін ғана іске қосты, қыркүйекке қарай тағы екеуін енгізуді уәде етті. Ермағанбет Бөлекпаев бұл жұмысты жеделдету қажеттігін атап өтті.
Полиция департаментінің хабарлауынша, Қарағанды – Балқаш тас жолында 17 автопатруль кезекшілік етеді. Қауіпсіздікті бақылау үшін олардың саны тағы да артады.
Қарқаралыдағы туристер жағдайына қатысты кемшіліктер де талқыланды.
– Қазір біз Балқаш пен Қарқаралы бойынша проблемалық мәселелерді айқындадық. Бірақ басқалардың да босаңсуына болмайды. Теміртау мен Абай ауданы әкімдерінің назарын аударғым келеді: қазір сіздердің де су қоймаларыңызда демалушылар көп. Ақтоғай ауданы да солай. Санитарлық аймақтар, қоқыс шығару, тұрақтар – осының бәрі біздің назарымызда. Ал біздің ең басты міндетіміз – туристердің қауіпсіздігін қамтамасыз ету! – деп түйіндеді Ермағанбет Бөлекпаев.
Туристік маусым кезінде демалыс орындарында дәрігерлер де, полиция де тұрақты кезекшілік етуі тиіс.
Облыс әкімі таяу күндері барлық бағыттар бойынша жан-жақты талдау жасауды тапсырды.
Материалды әзірлеген Аида РАХЫМҚҰЛОВА
