Облыс кәсіпкерлері 2026 жылдан бастап 2% мөлшерлемемен жұмыс істейді

Қарағанды облысының қала және аудан мәслихаттары кәсіпкерлер үшін маңызды шешім қабылдады. Депутаттар облыс әкімі Ермағанбет Бөлекпаевтың ұсынысын қолдап, оңайлатылған декларация негізіндегі арнайы салық режимінің мөлшерлемесін 4%-дан 2%-ға төмендетуге дауыс берді. Жаңа мөлшерлеме 2026 жылдың 1 қаңтарынан бастап күшіне енеді. Бұл туралы облыс әкімдігінің баспасөз қызметі мәлімдеді.

Бұл өзгеріс бизнеске түсетін салықтық жүктемені айтарлықтай жеңілдетіп, кәсіпкерлерге шығындарын азайтуға мүмкіндік береді. Үнемделген қаржыны кәсіп иелері өз қызметін кеңейтуге, жаңа жобаларды іске қосуға және жұмыс орындарын көбейтуге бағыттай алады.

– Бұл шара Қарағанды қаласында тіркелген 43,7 мыңнан астам шағын және орта бизнес субъектілеріне қолдау көрсетеді. Қабылданған шешім өңірімізде бизнес ашудың тартымдылығын арттырып, салықтық жүктемені едәуір төмендетеді, – деді Қарағанды қалалық мәслихатының депутаты Дәуір Құрманғалиев.

Айта кетейік, Қарағанды облысы екі жыл бұрын елімізде алғаш болып бөлшек сауда салығының төмендетілген мөлшерлемесін енгізген болатын. Бұл бастама тиімділігін дәлелдеді: кәсіпкерлердің саны артып, ШОБ секторынан түсетін салық түсімі көбейді.

Өңірде кәсіпкерлікті қолдау алдағы уақытта да басым бағыттардың бірі болып қала бермек.

Аида РАХЫМҚҰЛОВА
Ortalyq.kz