Облысқа жұмыс сапарымен Өнеркәсіп және құрылыс министрі келді
ҚР Өнеркәсіп және құрылыс министрі Ерсайын Нагаспаев Қарағанды облысына жұмыс сапарымен келіп, бірнеше кәсіпорынның жұмыс барысымен танысты.
Ең алдымен Саран қаласындағы «Tengri Tyres» шина зауытын аралады. «Tengri Tyres» – жеңіл және жүк көліктеріне арналған шиналар өндірісімен айналысатын инновациялық кәсіпорын. Зауыт 2024 жылдың 1 шілдесінде пайдалануға берілді және Қазақстандағы шиналар өндірісіндегі ең ірі инвестициялық жобалардың бірі болып табылады. Жоба құны – 234 млрд теңге, салынған инвестициялар көлемі 281,4 млрд теңге құрайды. Зауыттың жалпы алаңы – 76,8 га, жобалық қуаттылығы жылына 3,5 млн шина құрайды. Кәсіпорындағы жұмыс орындарының саны – 1 125 құрайтын болады, қазіргі уақытта 839 адам жұмыс істейді.
Зауыт Қазақстанның ішкі нарығын дамытуға белсенді түрде қатысып, сондай-ақ өнімдерін Кедендік одақ елдеріне және Орталық Азия елдеріне экспорттауда. Жобалық қуаттылыққа шығу 2027 жылға жоспарланған.
Сонымен қатар, 2024 жылдың қыркүйек айында Jac маркалы отандық көліктерге арналған шиналардың жеткізіле басталғаны хабарланды. Attar брендінің шиналары Қазақстандағы дилерлік орталықтар арқылы сатылуда және Ресейге экспортталады. 2025 жылы компания 1,2 миллион шина өндіруді жоспарлап отыр, әрі экспорттық әлеуетін дамытып, өнім сапасын арттыру үшін жаңа технологияларды енгізуді жалғастырады.
Министр «Silk Road Electronics» ЖШС өндіріс орнына барды. Зауыт 2023 жылдың 4-тоқсанында іске қосылған. Жалпы алаңы 48 221 ш. м. құрайды.
Жобаға салынған инвестициялар көлемі 24,9 млрд. теңге. Қазіргі таңда зауытта 1 136 жұмыс орны ашылған. 2024 жылы 180 мың бірлік техника өндірілген.
Ерсайын Нағаспаев «QazТehna» ЖШС-де болды. Зауыт 2021 жылы іске қосылып, автобустар мен арнайы техника өндірісімен айналысады. Жоба құны 22,1 млрд. теңгені құрады.
Зауыттың жылдық жобалық қуаттылығы 1500 бірлік техниканы құрайды. 2024 жылы зауыт 1 616 бірлік техника өндірді, оның ішінде 1 437 бірлік жүк көліктері, 179 бірлік жолаушылар автобустары және жол техникалары бар.
Қазіргі уақытта «QazТehna» зауытында 803 адам жұмыс істейді. Компания Қазақстанның ішкі нарығына арналған өнімдерін шығаруда және өз өндірісін әрі қарай дамыту жоспарларын жүзеге асыруда.
Материалды әзірлеген Аида РАХЫМҚҰЛОВА
