Оқырмандар клубы құрылды
Бұқар жырау аудандық орталық кітапханасы мен Жастар ресурстық орталығының ұйымдастыруымен аудандық Мәдениет үйінің Коворкинг орталығында “Шың” оқырмандар клубы құрылды.
Бұл клубты құрудағы мақсат әдебиетке қызығушылықты артыру,қазақ және әлем әдебиеті классикасына терең бойлап,ол туындыларды талқылап,жастар арасынан оқырмандар қатарын толықтыру болып табылады.
Клубтың ашылу салтанатында аудандық мәдениет және тілдерді дамыту бөлімінің басшысы Нұрсұлтан Шәменов құттықтау сөз сөйлеп,аудандық орталық кітапхананың библиографы Айсұлу Бердімұрат “Қазақ әдебиеті” атты кітап көрмесімен таныстырып, сонда тұрған туындыларға шолу жасады. Мұнда белгілі әлеуметтанушы Санжар Керімбайдың “Өзбекәлі және мәдениет майданы”, Қаныш және ғылыми майдан” кітаптары да бар.
Салтанат үстінде мектеп оқушылары Нұрлыбек Мәжитов халық әні “Қаз балапанды” шебер орындап,Ерсұлтан Шарапатов Ұлы Абайдың “Ғылым таппай,мақтанба” өлеңін мәнерлеп жатқа оқыды.
Жаңадан оқырмандар клубына сол күні 30 адам мүше болып,олар ай сайын оқыған екі кітабын талдап,талқылап,өзара пікір алмасатын болады.Сол үшін жыл бойы оқылатын әдеби туындылардың тізімі жасалынып,оларға ұсынылды.
Ержан ИМАШ,
Бұқар жырау ауданы
