Оқушыңыз сабақта ChatGPT пайдалана ма?
ЖИ-дің түрлі салаға енуі ақпаратқа тез арада қол жеткізуге жол ашты. Тіпті, білім саласында да оның арнайы бағдарламалары оқушылардың тапсырма орындауына көмек беруде. Десе де, кей мұғалімдер ChatGPT сияқты көмекші баланың ойлауын тежейді деген пікірде. Біз осыған орай аймақтағы мұғалімдерден «Оқушыңыз тапсырма орындағанда ЖИ пайдалана ма?», «Өз пәніңізде оқушыларға ChatGPT қолдануға рұқсат бересіз бе?» деп сұрақ қойған болатынбыз. Жауабы төмендегідей.
«Оқушыларым ChatGPT пайдаланады. Әрине, ауылдық жерде тұрған соң, көптеген ақпараттар қолжетімсіз. Сондықтан, керек ақпаратты ChatGPT-ден алады. Мен орыс тілі пәнінен қазақ сыныбына бергендіктен, кей сөздердің мағынасын түсінуі үшін оқушыларға ЖИ қолдануға рұқсат беремін. Бірақ, көшіртпеймін, мейлінше өз ойларын жазады. Бізде сөздіктер аз, тіпті, кейбір түрлері жоқ. Сондайда орысша сөздердің мағынасын терең ұғыну үшін оқушыларға ЖИ көмектеседі. Тиімділігі бар, дегенмен, академиялық адалдық, этика міндетті түрде сақталуы керек.
Біз алдымыздағы оқушыларды бес саусақтай білеміз, ChatGPT-ден жауапты көшіріп алып келген оқушы бірден көрініп тұрады. ЖИ пайдалануға белгілі бір шектеу, плагиатқа тексеретін бағдарлама болса, жақсы болар еді. Сондықтан, ЖИ-дің тек ұтымды жағын пайдалану керек деп ойлаймын».
Анель БАЙМҰРЫНОВА,
Мәнжі батыр атындағы Қаражар ЖББ мектебінің
орыс тілі мен әдебиеті пәні мұғалімі
Бұқар жырау ауданы
«Білім саласында балаларға ЖИ-ді пайдалану қажет емес. Қазір балалар ойлануды қойды, дайын жауапты көшіріп алады. Күннен-күнге дамып жатқан ChatGPT-дің ойы адамнан кем емес. Тіпті, тапсырма жауаптарын ЖИ жазды ма, оқушы өзі жазды ма, ажыратып болмайтын дәрежеге жеттік. Егер бала сабақта қолданса, «Жасанды интеллектіні қолдандым» деп айтуы керек немесе сілтеме жасауы керек.
Қазіргі заманда цифрлық құралдардың тілін білгеннің көп көмегі тиеді. Әсіресе, мұғалімдер үшін ЖИ – қосымша көмек. ЖИ-ді пайдалану жас ерекшелікке қарамайды. 35 жыл мұғалімдік тәжірибесі бар менің өзіме ол тарих сабағынан жоспар жасауға, тақырып бойынша тест құрауға, презентация жасауға көмектеседі».
Кеңдік РАЙЫМХАНҰЛЫ,
Әлімхан Ермеков атындағы ЖББ мектебінің директоры
Ақтоғай ауданы
«Заман талабына сай оқушылар сабақта ChatGPT пайдалансын. Бірақ, міндетті түрде шектеу болу керек. Кейбір оқушылар үй тапсырмасын орындау барысында көп қолданады. Ол тапсырманы тексерген кезде анық көрініп тұрады. Бірақ, орындаған тапсырмасына қарай қосымша сұрақ қойып бағалаймын. ChatGPT-дің күрделі тақырыптарды өткенде немесе тың мәліметтер іздегенде, сөздікпен жұмыс жасағанда пайдасы бар. Ал оның зиянды жағын ұмытпау керек. Дайын жауаптарды ала салады. «Өздері ізденгісі келмей, осы ChatGPT-ге тәуелді болып қала ма» деген қорқыныш та жоқ емес. Бізде оқушылар сабақ барысында жасанды интеллектіні де, ChatGPT-ді де сирек пайдаланады. Өйткені интернет желісі барлық жерде ұстамайды».
Әсем ЖАҚЫПБЕКОВА,
Ыбырай Алтынсарин атындағы тірек мектебінің
қазақ тілі мен әдебиеті пәні мұғалімі
Абай ауданы
«Мектебімізде оқушыларға телефон қолдануға рұқсат етілмейді. Сондықтан, олар ChatGPT пайдаланады деп айта алмаймын. Тіпті, үйге берілген тапсырмаларды ЖИ-ден көшіріп әкелмейді. Жоғары сынып оқушыларына информатика сабағында ЖИ бағдарламалары туралы тақырып берілген. Соны жан-жақты түсіндіреміз. Қолданған күннің өзінде тиімділікке жұмсауға тырысамыз, мәселен, «Мамандықтар атласы» облыстық байқауына оқушылар ЖИ-мен жасалған бейнероликтерді ұсынды.
ЖИ тақырыбы және информатика сабағы – компьютермен, телефон, интернетпен орындалатын іс. Ауылдық жерде жарық жиі өшеді. Бізге басты кедергі осы».
Жанар ДҮТБАЕВА,
Әлихан Бөкейхан атындағы тірек мектебінің
информатика пәні мұғалімі
Осакаров ауданы
